WILLEMSTAD.- Parlamentario hulandes ta pidi pa mas atenshon di Hulanda pa trafikashon di hende riba islanan Karibense di Reino Hulandes. Diferente miembronan di parlamento a pidi preguntanan na sekretarionan di estado Raymond Knops (Relashonnan di Reino) i Ankie Broekers-Knol (Hustisia i Seguridat) relashoná ku e tópiko. E ta toka di parlamentarionan Don Ceder i Mirjam Bikker (ámbos ChristenUnie) i Joba van den Berg i Anne Kuik (ámbos CDA). Parlamentarionan ta pidi si e dos sekretario di estado ta na altura di e artíkulo ‘Sint Maarten wil hulp van Nederland in seksindustrie’, ku ta un artíkulo di e wèpsait Curacao.nu. Tambe nan ke sa si e sekretarionan di estado ta na altura di remarkenan tokante trafikashon di hende den ‘Staat van de Rechtshandhaving Caribisch Nederland’ i tambe e rapòrtnan ku ‘Secretary of State’ di Merka a publiká tokante parti Karibense di Reino Hulandes, e ta toka di e rapòrtnan ‘TIP’.
E parlamentarionan ta pidi e mandatarionan kiko ta nan impreshon relashoná ku e trabou ku ta wòrdu hasi pa kombatí trafikashon di hende riba e islanan. Por ehèmpel nan ta pidi kuantu kasonan den korte tabata wòrdu trata den e último sinku aña kontra hende ku tabata enbolbí den trafikashon di hende. I tambe kuantu hende a haña un kondena. Nan ke sa tambe kuantu hende a entrega un keho relashoná ku trafikashon di hende den parti Karibense di reino Hulandes i kuantu hende a bira víktima di trafikashon di hende riba e seis islanan.
Otro preguntanan ku e kuater parlamentarionan ta hasi ta relashoná ku yudansa for di Hulanda pa kombatí trafikashon di hende. Tambe nan ta pidi e sekretarionan di estado ku te ainda tin un problema di interkambio di informashon relashoná ku kasonan di trafikashon di hende.
Pa e kuater parlamentarionan ta importante pa sa kon Hulanda por yuda kombatí trafikashon di hende riba e islanan. Nan ta pidi e sekretarionan di estado pa duna parlamento hulandes mas informashon tokante e manera kon Hulanda ta yuda pa kombatí trafikashon di hende den parti karibense di reino Hulandes.