WILLEMSTAD.- Segun minister di Relashon Eksterior di Hulanda Stef Blok ta importante ku Venezuela habri su fronteranan bèk pa Kòrsou, Aruba i Boneiru mas lihé posibel. ‘Ta nos intenshon pa restablesé tráfiko di persona i transporte entre e paisnan for di momentu ku e situashon di salú den e paisnan normalisá atrobe.’ Awor tin basta hende kontagiá di COVID-19 na Venezuela. Blok: ‘Nos tin ku warda wak kon e situashon ta bayendo, pero intenshon di Reino Hulandes ta pa e situashon entre e paisnan bira normal atrobe.’
Blok a bisa tambe ku for di kuminsamentu di 2021 lo ta posibel pa instalá un sistema di visa pa venezolanonan ku ke bishitá e paisnan Kòrsou, Aruba i Sint Maarten i tambe Boneiru. ‘Téknikamente nos por instalá esei. Pero tur kos tin di aber ku situashon di e pandemia.’ Segun Blok ta importante ku lo tin kontròl fuerte riba tráfiko di persona i produktonan entre e paisnan.
Minister-presidente di Kòrsou Eugene Rhuggenaath djamars último a bisa ku a deliberá ku minister di Relashon Eksterior di Hulanda tokante situashon den e region. ‘Nos a palabrá tokante krísis di COVID-19, pero tambe tokante seguridat den e region. Nos ke traha huntu ku Hulanda pa fortalesé nos seguridat.’
Tambe Rhuggenaath den e kombersashon ku Blok a menshoná relashon ku Venezuela. ‘Nos tin un relashon hopi importante ku Venezuela. Nos tin lasonan familiar, pero tambe kultural i komersial.’
Rhuggenaath a splika durante deliberashon ku Blok ku pa Kòrsou ta importante pa aserká Venezuela. ‘Ta nos intenshon ku nos por kuminsá deliberashon ku Venezuela tokante habrimentu di frontera, ku tin ku tuma lugá gradualmente i bou di sierto kondishon. Esaki ta importante pa famianan, pero tambe pa empresarionan lokal. Pero tambe pa henter nos komunidat.’
Blok mes a splika ku relashon ku Venezuela ta ‘hopi importante’. Pa motibu ku e ta un pais bisiña di Kòrsou, Aruba i Boneiru. Segun Blok Hulanda ke urgi Venezuela pa habri fronteranan lihé; na mesun momentu Blok ta enfatisá ku na promé instansia tin ku tuma nota di situashon di salubridat. Na opinion di Blok no tin ku habri frontera si tin hopi kaso di COVID-19 na Venezuela.