WILLEMSTAD.-  E hòmber hulandes Rutger Hasenbosch (38)  kondena na 24 luna pa aksidente ku morto dia 6 di ougùstùs 2018, a apelá su sentensia.

Hasenbosch a apelá pa motibu ku e no ta di akuerdo ku e veredikto di korte di promé instansia.

Riba e dia enkuestion un hòmber turista a pèrdè su bida durante di e aksidente di tráfiko, ku a tuma lugá den área di Bándabou, ora ku dos vehíkulo a aksidentá.

A resultá ku e shofùr (akusado) di un SUV ku tabata bayendo den direkshon di Soto, pa motibunan deskonosí a kore riba su man kontrali i dal kontra di un outo di famia ku tabata bini den direkshon di Fontein.

E shofùr, e hòmber víktima ku a fayesé tabata un turista i tabata huntu ku su  partner.

Fiskal  Out a duna di konosé  durante tratamentu di e kaso ku den e prosèsverbal polisnan a relatá ku na nan yegada nan a tuma nota ku ta trata di “dood door schuld“ mes ora, tumando na konsiderashon ku tabata bisto ku e shofùr ku a kousa e aksidente tabata bou di influensia di alkohòl.

En konekshon ku esaki, polis a detené e akusado dor di manehá  un vehíkulo bou di influensia di alkohòl i kousa un aksidente ku konsekuensia fatal, pero despues a rekobrá su libertat pendiente tratamentu di e kaso.

Durante tratamentu di e kaso famianan di e víktima por a sigui tratamentu via konferensia di video.

E akusado a bisa  ku e no ta kòrda nada ku a pasa.  E  tabata tur brua i ora ku e tabata den ambulans el a kuminsá bin bei un poko pero ainda e momentu ei e no tabata sa ku el a okashoná un aksidente.

Ta e hendenan para pafó, a sake fo’i outo i bis’e di e aksidente, asina el a deklará.

Pa loke ta trata uzo di alkohòl el a duna di konos’é ku e no ta ninga di a bebe, ni kuantu el a bebe ni kon largu e tabata bebiendo, pero esaki a tuma lugá sigur 4 ora promé ku e aksidente. Segun e akusado kisas dor di e sla na su kabes ku el a risibí durante di e  impakto di e aksidente, e no ta kòrda kiko a pasa.

E ta lamentá loke a sosedé i a pidi famianan di e víktima su máksimo diskulpa.

Fiskal a haña e akusashon kompletamente probá i a tuma e akusado hopi na malu di a kore su vehíkulo  bou di influensia di alkohòl.

Segun e abogado mr. Athena Sulvaran ku tabatin e defensa di e akusado na su enkargo a trese dilanti ku den e kaso aki no tabatin indikashon ku e akusado a kore ni duru ni peligroso, pero solamente tabatin alkohòl den su sistema.

Riba e dia enkuestion hues den su desishon a bai kompletamente di akuerdo ku fiskal i a honra su demanda ku ta 24 luna kastigu di prizòn i komo èkstra kondishon e akusado no mag di kore outo pa 4 aña largu. El a apelá su sentensia pa 3 hues wak e kaso kompletamente di nobo.