Doornbosch (47) ekonomista monetario

WILLEMSTAD.- Dia 11 di mart 2020, Hunta di Komisario di Centrale Bank van Curaçao en Sint Maarten (CBCS) a rekomendá Minister di Finansa di Kòrsou i Minister di Finansa di Sint Maarten pa nombra Richard Doornbosch komo presidente di CBCS.

Konseho di Minister di Kòrsou i Konseho di Minister di Sint Maarten a aseptá e rekomendashon di Hunta di Komisario. Intenshon ta pa nombra sr. Doornbosch na mitar di yüli, basta e proseso di screening di e servisionan di siguridat di Kòrsou i Sint Maarten keda kompletá ku resultado positivo.

Drs. R.A. (Richard) Doornbosch (1973) a studia ekonomia monetario i ekonomia di empresa na Rijksuniversiteit Groningen i ta fungi for di 2016 komo Direktor Ehekutivo Suplente di Fondo Monetario Internashonal (IMF) na Washington D.C. Doornbosch ta un ekonomista monetario ku mas di 20 aña di eksperensia den sektor finansiero, organisashon internashonal i atministrashon públiko.

El a kuminsá su karera komo management trainee na Rabobank International i a okupa diferente funshon (riba tereno di makroekonomia) na Ministerio di Finansa di Ulanda. Durante e krísis finansiero di 2008-2009, Doornbosch tabata miembro di e tim di maneho di Directie Financiële Markten i tabata enbolbí den e operashonnan di apoyo pa instituto finansiero. Den e periodo ku a hiba na e reforma estatal di 2010, el a dirigí revishon total di e legislashon di Ulanda Karibense riba tereno di merkado finansiero.

Di 2005 pa 2008, Doornbosch a traha na Organisashon pa Kooperashon i Desaroyo Ekonómiko (Organisation for Economic Co-operation and Development, òf OECD) riba e plan di akshon di maneho pa respondé na e riesgonan di kambio di klima ku ta kresiendo. El a sirbi komo negoshadó di parti di Ulanda den e proseso pa establesé Green Climate Fund (GCF) i komo miembro di e promé Direktiva di GCF. Komo hefe di e departamento di Ekonomia Internashonal i Instituto Finansiero, el a partisipá na diferente konsulta internashonal, manera di Banko Europeo pa Rekonstrukshon i Desaroyo (EBRD), OECD i IMFC Deputies.

Komo Direktor Ehekutivo Suplente na IMF, Doornbosch ta ko-dirigí e elektorado ulandes i belga ku ta parti di direktiva di IMF. Ademas di Reino ulandes i Bélgika, e elektorado akí ta konsistí di Armenia, Bosnia i Herzegovina, Bulgaria, Kroasia, Chipre, Georgia, Israel, Luxemburg,

Moldavia, Montenegro, Nort-Macedonia, Rumania i Ukrania. Den e funshon ei, Doornbosch tabata enbolbí den diferente programa di reforma di sektor finansiero.

Hunta di Komisario ta kontentu ku nominashon di Drs. Richard Doornbosch i ta konvensí ku, en bista di su eksperensia internashonal i ret di kontakto, e lo ta un miembro balioso di direktiva di Centrale Bank van Curaçao en Sint Maarten