WILLEMSTAD.-EXTRA a tuma nota durante di fin di siman ku den vários área i grupo sosial di komunidat ku hendenan tabata realmente satisfecho ku e notisia ku Refineria di Kòrsou i e grupo CORC a firma un ‘draft’ final ku ta enserá un paso hopi mas konkreto den direkshon pa logra reapertura di e refineria riba teritorio di Kòrsou.

Den seno di kontratistanan tambe por tuma nota di palabranan di satisfakshon i speransa konsiderando ku un reapertura di e refineria lo nifiká trabou pa algun mil trahadó i komo tal entrada pa nan famia. Investigashon ku EXTRA a hasi ta indiká ku e siguiente pasonan ku mester tuma lugá ta reunion di Hunta di Komisario di RdK den kua e gerensia di e kompania di gobièrnu mester presentá e akuerdo ku a firma ku CORC. Una bes komisariado di RdK duna su aprobashon na e akuerdo esaki por sigui kana su kaminda pa Konseho di Minister. Ta trata aki di un asina yamá ‘lopende zaak’ pues gabinete demishonario tin tur outoridat pa sigui atendé e desaroyo aki. Una bes ku Konseho di Minister duna su aprobashon i tin un desishon ofisial di Konseho di Minister riba e akuerdo e siguiente paso ta bira un sita na notario unda lo firma e dokumentunan ofisial.

EXTRA tin informashon ku ya kaba e trabounan di preparashon ta kanando na tur tres nivel, esta tantu den komisariado, Konseho di Minister komo na notario pa garantisa ku no ta bai tuma mas tempu ku ta nesesario.

Manera EXTRA a informa for di djabièrnè tempran, esaki ta un ‘point òf no return’ pa logra reapertura di e refineria. Ta bai prepará e refineria pa prosesá riba 5 mion bari di krudo pa luna i esei sigur lo trese hopi divisa. Tambe EXTRA a tuma nota ku e proseso di un pèrmit di molèster a kana su kurso pa finalmente Kòrsou lo por tin su refineria operando atrobe pa e próksimo 25 pa 30 añanan.