WILLEMSTAD.- Hustisia ta bai drenta skolnan atrobe. Tur hende por kòrda kon algun aña pasá polis den koperashon ku skolnan i algun otro departamento den gobièrnu a sa di estrechá e lasonan na skol pa medio di e proyekto di DARE. Pero pa motibu di sierto desaroyonan último tempu, gobièrnu a mira nesesidat pa entamá un proyekto similar pa drenta skolnan. Esei EXTRA por a komprondé for di un entrevista ku Minister di Hustisia mr. Quincy Girigorie.

Segun sr. Girigorie, pa algun tempu kaba a konstatá presensia di gèngnan na porta di skol, i polis ta determiná pa hala un strepi i pone un paro den esei. T’asina ku den kuadro di prevenshon gobièrnu a firma un protokòl ku direktivanan di skolnan (Protocol Veilige Scholen), esei despues ku a konstatá ku tin presensia di gèng na skolnan. A tene seshonnan di deliberashon i informashon huntu ku e sektor di enseñansa den e afan pa fortifiká e lasonan entre KPC i skolnan. Esaki ta enserá mas presensia di polis, mas patruyahe rònt di skolnan, pero tambe e parti preventivo.

Den periodo di karnaval tabatin un proyekto konosí komo “sendé sendé” kaminda hustisia a drenta skol. Ta un proyekto estilo DARE, pero e biaha aki ku koperashon di mas entidat manera Reclassering, pa papia i atendé asuntunan manera uso di droga, konsumo di alkohòl, sèks parotin etc. Pues e intenshon ta no solamente pa hustisia drenta skolnan, pero tambe pa deliberá u hóbennan pa asina por mira e banderanan kòrá mas lihé i no warda te ora ku baka hoga na pos.