WILLEMSTAD.- I AM ta klousurá e programa i kompetensia “I AM The Butterfly” ku un seminario, kaminda nan lo bai anunsiá ken ta e ganadó di nan kompetensia. I AM, un kompania dediká na fomentá responsabilidat sosial empresarial (RSE), ta kontentu pa klousura despues di 1 aña e programa i kompetensia "I AM The Butterfly" ku a wòrdu inisiá pa selebrá su di 10 aniversario.
Pa medio di e "I AM the Butterfly effect Program" a buska amplifiká e filosofia aki i stimulá un kompromiso mas amplio pa responsabilidat sosial. E mensahe sentral di e programa aki ta: akshonnan chikí por tin un impakto grandi. Dor di fomentá RSE i stimulá práktikanan empresarial responsabel, nan meta ta logra krea un kambio duradero i positivo den nos sosiedat.
Un total di 12 Fundashon i personanan ku bon inisiativa a partisipá den e kompetensia “I AM The Butterfly” i asina a demostrá ku akshonnan chikí tin un impakto grandi. Tur 12 inisiativa a wòrdu premiá komo estímulo pa sigui inspirá individuonan i organisashonnan pa usa nan máksimo potensial, kousando un efekto positivo den nos komunidat.
E 12 partisipantenan ta for di diferente sektor manera deporte, kultura, enseñansa i sosial.
Di e 12 partisipantenan, e 3 (tresnan) ku mas a sobresalí i a keda nominá ta Stichting HAS ku ta duna shelter na hendenan ku no tin un dak riba nan kabes den tempu di krísis; Fundashon Tur ta Konta ku ta yuda muchanan di skol ku matemátika i Fundashon Un bon Hóben pa un Bon Famia di e bario di Fuik ku ta duna alokashon na hóbennan despues di skol pa haña guia i ta konsentrá riba e mucha hòmber pa e krese i lanta un hòmber responsabel den komunidat.
E ganadó lo wòrdu anunsiá durante un evento sosial ku ta e seminario ku ta toka e tema di RSE ku ta tuma lugá dia 9 di novèmber awor na Banko Sentral.

E evento ta wòrdu organisá pa eduká, inspirá tambe pa pasa un ratu plasentero ku posibilidat pa establesé kontaktonan ku partidonan presente. Lo ta bai tin diferente oradornan spesialisá riba e área aki. Tambe lo ta bai tin un eksperto di Medellín ku lo konta e eksperensianan ku un bario marginá manera Comuna 13 a desaroyá su mes den un atrakshon turístiko. Tambe tin oradónan lokal ku ta Curt Schoop, Levi Silvanie i tambe sra. Neysa Isenia.
I AM ta invitá negoshinan i organisashonnan pa konsiderá patrosiná i partisipá na e programa impaktante aki. Patrosinio no solamente lo sostené e mishon di fomentá responsabilidat sosial, sino tambe lo brindá patrosinadónan visibilidat i rekonosimentu prominente durante e seminario i durante e durashon di e programa.