WILLEMSTAD – I AM, ku ta ofresé servisio di recruitment, training i HR-support, a lansa un kompetensia bou di e nòmber ‘Butterfly Effect Competition’. E kompetensia ta basá riba e konsepto di e ‘Butterfly Effect’, ku ta bisa ku kada inisiativa, mas kon chikí e ta, por tin konsekuensianan positivo i resultá den kambionan grandi den sosiedat. Ku e kompetensia I AM ke spòtlait personanan i organisashonnan ku ta realisá un Butterfly Effect den nos komunidat. Nan tin chèns di gana diferente premio finansiero.
E kompetensia ta forma parti di e selebrashon di 10 aña di eksistensia di I AM. Danny Evers, fundador di I AM ta bisa: “Na Kòrsou hopi hende i organisashonnan ta hasi hopi bon trabou, sin haña pago pa esaki. Nan ta guia hóbennan abandoná bèk riba e bon kaminda; nan ta yuda hende muhé den un situashon finansiero difísil haña un perspektiva ekonómiko nobo, òf nan ta siña grandi i chikí kon pa desaroyá nan talentonan. Inisiativanan manera esaki ta eksistí riba tur tereno: enseñansa, deporte, kultura, kuido di hende ku un desabilidat, medio ambiente, tayer di trabou, i hopi mas.”

Ku e kompetensia, I AM ke enfatisá ku tin hopi hende i organisashonnan ku ke forma parti di un kambio den sosiedat. Nan enfoke i método di traha por mustra na promé instansia chikí, pero riba término mas largu, e ola di kambio ku nan a inisiá por tin konsekuensianan positivo hopi grandi. Ademas di spòtlait e proyektonan, I AM ta aspirá pa nan ta un fuente di inspirashon i un ehèmpel pa henter komunidat.
E Butterfly Effect ta impliká ku un inisiativa chikí por tin konsekuensianan positivo impresionante i ta mustra ku kada un di nos, hopi be sin sa of sin tin e intenshon ei, por krea sírkulonan konsentriko di infuensia ku por influensiá otronan pa años òf asta pa generashonnan. “Loke nos ta hasi kada momento di dia tin be por tin un influensia grandi riba e komportashon di e hendenan rònt di nos. Espesialmente riba e hendenan ku ta buska kontakto ku nos pa empoderá òf inspirá nan mes, òf ku nos mes konsientemente ke influensiá di un manera positivo”, asina Danny Evers ta bisa.

Un komishon independiente lo evaluá tur proyekto ku partisipá den e kompetensia. Lo husga e proyektonan a base di kuater kriterio ophetivo: urgensia sosial, nivel di boluntario, apresio úniko, i butterfly impakto. Tur partisipante ku ta kumpli ku e kriterionan aki por gana premionan finansiero na kualkier momento di e kompetensia. E tres mihónan ta partisipá den un final riba 16 di òktober 2023. Tur siman lo publiká partisipantenan i ganadónan intermedio riba e wèpsait di I AM (www.iam.cw). Inskripshon di inisiativanan ta tuma lugá riba e wèpsait tambe.

Riba e tres portrètnan por mira tres proyekto ku ya kaba a gana un premio di NAF 1,000: Hubentut Ambiente Sano (HAS Shelter), GreenKidz i Handicaps Rights Foundation.