WILLEMSTAD.- Manera EXTRA a antisipá den su edishon anterior, korte di promé instansia ayera a bolbe posponé kaso asesinato “De zon”  dia 22 di yüni aña pasá. E kaso a keda posponé pa motibu ku ainda e investigashon no ta kla.

Fiskal a splika ayera ku algun siman pasá a hasi rekonstrukshon di e kaso, di kual nan por  haña un idea kon tur kos a bai.

Segun fiskal a resultá ku e  imágennan di kámara na e toko chines  a keda destruí. Nan a purba wak si NFI por a hasi algu pero e tim di e instituto forensiko na Hulanda no a logra saka nada afó for di e material.

Loke si nan tin, ta e imágennan di kámara di kaya di loke a pasa e anochi ei, ku ainda tin ku wòrdu studiá.

E dia ei Idrick Sebastian Francisca  di 24 aña a keda asesiná ku un arma kandela di un forma misterioso.

E hòmbernan Jerrel Nivillac (30), Sherwin (Pumpi) Pieters (19) , Druwently (Droopi) Pieter (28) i Yu Liang Wu (22)  ta esnan ku ta keda akusá di a kometé e akto. Tur ta ninga nan akto.

Nivillac durante un kaso di pro forma a  duna deklarashonnan inkriminatorio tantu pe komo su ko akusadonan.

El a konta ku nan a sali  Kura Piedra  e dia ei, despues ku e hòmber “Sueño” ku ta famia di Pumpi a keda asesiná.

Na kaminda pa kas bèk, nan a sinti un vehíkulo tabata persiguí nan. Hansha di morto a drenta nan i a bira basta nèrvioso.  Direpente nan a mira un vehíkulo ku tabata aserkando. A resultá di tabata  Fransisca ku a bira e víktima di e asesinato. Nivillac a akseptá ku e tabatin arma e dia ei, el a trata na tira den laira, pero bala no a sali. Despues el a bai su kas i a tende tiru pero no sa kiko a pasa.

Segun Nivillac Pumpi i Droopi ta esnan ku a basha bala riba e víktima.

El a bisa Droopi a kont’é ku Pumpi a tira i e a kita e arma i kaba e lachi riba e víktima. Awa na wowo el a bisa ku nan a mata hende robes i inosente. Nan tur tabata spantá e anochi i a kometé un fayo grandi. Ayera un bia mas e akusadonan Pieters, Pieter i Liang Wu a bisa ku nan ta kompletamente inosente i no sa nada di e kaso. Pieter a bisa ku e Nivillac mester stòp di keda gaña riba nan pa laga nan keda será.

Hues na final a bisa ku tur hende lo keda será te dia 28 di òktober binidero ora ku e kaso wòrdu tratá integralmente.

Despues di kaba di kompletamente ku e investigashon.