WILLEMSTAD.- E medidanan ku a keda imponé pa sostené ekonomia di Kòrsou ku yudansa di Hulanda a suavisá e shòk di COVID-19 i a salba bida sosial den pais. E medidanan aki huntu ku yudansa di Hulanda a sostené empleo i a yuda evitá un situashon di bankarotanan masal. Sinembargo e kontrakshon ekonómiko tabata severo, miéntras e perspektivanan ta un reto i suheto na inseguridat kresiente i riesgo. Asina Fondo Monetario Internashonal (IMF) ta bisa den su último rapòrt riba e situashonnan na Kòrsou i St. Maarten.
Mas aleu e ta bisa ku, e focus a para bira un de-eskalashon seif di nos ekonomia, ku sosten kaminda esei ta nesesario i asina pone e base pa un rekuperashon inklusivo i durabilidat di término medio. Kampañanan aselerá di vakunashon, partikularmente na St. Maarten, lo por yuda den e rekuperashon dje sektor di hospitalidat.
Mas aleu IMF ta bisa ku, ta masha importante pa proveé fuentenan apropiá pa arianan krítiko manera e.o. den sektor di salú, atministrashon fiskal, i tambe e ret di data i informashon. Akuerdonan ku Hulanda (Landspakket) ta presentá un lista di oportunidat pa implementá reformanan struktural pa sostené un rekuperashon i sigurá durabilidat di término medio.
Un implementashon fuerte pa loke ta reformanan fiskal i un rekuperashon ekonómiko duradero ta nesesario. Ta nesesario pa ámbos pais fortifiká nan atministrashon fiskal komo un asuntu di urgensia i implementá reformanan di polítika fiskal i mehorá transparensia.
Segun IMF, e límite di debe di 40 porshento di e produkto bruto doméstiko ku a keda rekomendá lo no ta faktibel a ménos ku un parti di e sosten di likides ser kombertí den regalo (schenking). E esfuerso di outoridatnan pa atendé ku e vulnerabilidatnan den sektor finansiero ta bon biní i mester ser sostené pa atendé ku e fragilidatnan den sektor bankario. Desaroyo di un Programa di Reforma pa Sektor Finansiero tabata un paso signifikante padilanti. I un implementashon kuidadoso pa loke ta e sekuensia di medidanan lo ta klave pa por atendé ku e partinan vulnerabel.
Buskando arianan nobo pa kresementu, sostené dor di reformanan struktural fuerte lo por yuda mitigá kualke shòk i stimulá kresementunan potensial.