WILLEMSTAD.– E desbalanse ku pago adelantá di number di outo ta krea, a pone ku a disidí ku no ta posibel mas pa paga number di outo den desèmber. Den pasado semper esei tabata posibel den e último luna di aña pa loke ta trata e aña ku ta sigui. Pero den práktika e entrada ku ta generá den desèmber ta bai kore pa e aña koriente riba presupuesto na lugá di e aña despues loke ta krea un situashon ku ta afektá presupuesto di Gobièrnu di Kòrsou, Asina Alfonso Trona di Ontvanger di Kòrsou, a splika e siman aki.

EXTRA a haña diferente yamada di hende ku a pone nan sèn un banda pa asina kumpli ku e pago aki pero no tabatin e oportunidat pa  hasi esei e aña aki. Lo por kuminsá paga djamars awor dia 3 di yanüari. Djaluna, Ontvanger meskos ku otro servisionan di gobièrnu lo ta será. Den pasado tabata posibel pa paga den mas ku un término, pero e no a duna resultado.

Awendia Ontvanger ta stimulá pa paga e loke mester paga den un pagá. Importante ta tambe pa tur hende realisá ku e sèn ku Ontvanger ta kobra ta bai pa proyektonan spesífiko komo ku ta trata di un “bestemmingsbelasting” ku ta destiná entre otro proyektonan di infrastruktura.

Trona a bisa tambe ku e aña aki pagamentu di number di outo a bai mas mihó ku e aña anterior. Por sierto el a aklará ku no ta pa number di outo ta paga pero mas bien pa e sticker. Number di outo lo no kambia por lo pronto. Un di e desishonnan ku a yuda den pagamentu di number di outo ta e hechu ku no ta posibel mas pa haña dispensashon di pago di number di outo pa e aña koriente pa paga e number di otro aña. Ku otro palabra awendia e number di outo mester ta pagá kompletamente pa e aña koriente pa por kumpra e sticker pa e aña siguiente, asina el a splika.

Por sierto ku si un hende pèrdè su plachi tin un prosedura ku mester sigui. Mester apliká serka Ontvanger pa formalisá e proseso.

Den fin di aña por señalá ku ainda tin outo ta kore sin paga e number di e aña aki. Trona a bisa ku Ontvanger no por hasi nada kontra esei komo ku esei ta basá riba kòntròl di polis.