Ieteke Witteveen a trese algun ehèmpel práktiko dilanti:

WILLEMSTAD. – Relashoná ku e forma kon refugiadonan venezolano ta keda tratá aki na Kòrsou pa despues keda “deportá” pa Venezuela, Ieteke Witteveen di Human Rights Defense Curaçao (HRDC) a trese algun ehèmpel dilanti, di kiko e venezolanonan ta pasa aden den barak.

Witteveen ta splika ku un gran kantidat di refugiado repatriá i migrantenan den krísis a solisitá asistensia legal via Human Rights Defense Curaçao. A nenga Human Rights Defense Curaçao akseso na su klientenan den e baraknan di SDKK pa verifiká si nan ke a bai nan pais bèk òf si ta preshon tabata pone riba nan.

A hisa un mucha hòmber menor di edat pone riba avion, kontra tur e regulashonnan internashonal, sin un deklarashon skibí di su mayornan. El a indiká ku su trato aki tabatin asina un impakto sikológiko riba dje, ku e no por a keda mas.

Tambe tin e kuestion di dos muhé ku parse a bira víktima di abuso seksual di parti di miembronan di seguridat (bewaking). Miéntras e kasonan akí tabata bou di investigashon, e muhénan akí a laga deportá nan ‘boluntariamente’.

Den tal konteksto, e konklushon ku ta trata aki di un repatriashon boluntario ta laga un smak basta marga atras.

Esakinan ta algun ehèmpel doloroso ku ta konosí den práktika. Huntu ku sosionan lokal i internashonal HRDC sa ku e situashon di hopi venezolano aki na Kòrsou, ta sigui di ta teribel i ku demasiado frekuensia ta karakterisá pa eksplotashon i senofobia (rechaso di strañero). Demasiado frekuente ta nenga nan oportunidat o perspektiva real.

HRDC ke enfatisá ademas  i no ta promé biaha nan ta hasi esaki ku responsabilidat di rèspèt pa derechonan humano ta un asuntu di Reino. Ta notabel ku presisamente Sekretario di Estado, kende ta mashá komprometí ku kooperashon den  hopi área (inkluyendo esunnan kaminda Kòrsou ta outónomo) nèt e ta deskuidá kaminda ta trata derechonan humano. E ta sigui insistí ku Kòrsou mes ta responsabel i prinsipalmente ku ta trata aki di un asuntu interno. Esaki no ta den konkordansia ku ‘Statüt’. Nashonnan Uní tambe ta mustra repetidamente den informenan di derechonan humano ku ta eksistí un responsabilidat konhunto.

Ademas, un konsekuensia indeseabel di e desafio akí ta ku outoridatnan kompetente na Den Haag aparentemente ta adoptá e vershon di Ministerio di Hustisia di Kòrsou, loke ta karga e riesgo ku ta propagá kontestanan suphetivo i polítikamente korekto. Di e mes manera ku e Sekretario di Estado a kompromet’é ku e yudansa di suministrá alimento na e migrantenan indokumentá, asina tambe e mester desempeñá un papel den garantisá e stèndertnan mínimo pa trato humanitario di e grupo akí.

P’esei,  HRDC ta bolbe argumentá ku e seramentu den barak, riba tereno di prizòn i semper bai ainda bou di kondishonnan degradante, mester kambia pa un mihó akohida pa e venezolanonan ku ta buska refugio aki.

HRDC ta dispuesto di kooperá ku tur hende ku ta deseá pa respetá e derechonan humano di e grupo di buena fe di venezolano na nos pais.

 

LAGA UN KOMENTARIO

Please enter your comment!
Please enter your name here