WILLEMSTAD.- Ántes ora nos mira barku na Jetty-nan di Refineria Isla ta algu masha normal, sinembargo awendia ku e blokeo i seramentu di frontera kousa pa Venezuela a bira algu basta sporádiko ku nos ta mira barku mará na kualke pir di Refineria Isla. Esei ta e kaso awe i mesora EXTRA a bai chek si akaso ta krudo pa Isla. Bosero di refineria a kontesta ku esei no ta e kaso.

Siguiendo e investigashon EXTRA a haña sa ku ta nos kompania Curoil ta importá produktonan pa abastesé nos merkado. Semper Curoil a indiká ku nan tei pa sirbi e komunidat aki i banda di esei ta hasi hopi esfuerso pa hasi negoshi riba tereno internashonal pasobra ta einan Curoil ta logra hasi un ganashi.

Den kombersashon ku direktor di Curoil el a konfirmá ku e barku Trent na mará na un Jetty di Isla i  ta deskargando e produkto Avtur pa Curoil. E produkto Avtur ta un tipo di aviation fuel diseñá speshalmente pa avionnan ku tin motor di turbina di gas.

Tene kuenta ku tin 255 persona ta traha na Curoil

Den kurso di mayan (red.djaweps) por spera un otro barku mas, den e kaso ei e barku Penelope M ku ta bin trese gas propaan pa Curoil.