No tin registro no tin nada

WILLEMSTAD.- E problema di terenonan di famia aki na Kòrsou ainda no por haña solushon. Tin algun siudadano ku ta bisa ku ta nan ta desendiente di e doñonan ántes di tereno, pero banda di esei tin hopi hende mas ta bisa meskos i no tin un registro ku ta trese klaridat i e problemátika aki ta andando ya pa hopi aña aki na Kòrsou.

Den siman tras di lomba Korte Sivil a saka un    “beschikking” relashoná ku e problemátika di ‘tera di famia’, esta pa sa ken realmente ta doño di e ‘tera di famia’.

Hues a formulá algun pregunta ku a korte ta hasi Gobièrnu i ta pidi kontestá pa dia 11 di yüni benidero.

Ta trata di kasonan andando pa basta tempu kaba kaminda ku tin un par di shen hende i pa algun tereno asta ta yega na algun míles di hende enbolbí den e terenonan. Hopi biaha hendenan ku no por lokalisá mas. Den e desishon temporal, korte ta splika ku e terenonan aki ta riba nòmber di hendenan ku a muri mas ku 300 aña pasá.

Dor ku hopi tempu a pasa, no tin un bon registrashon, no tin nòmbernan konkreto, no tin fecha di nasementu di esnan ku ta doño di tereno, no tin fecha di fayesimentu, no por saka afó tampoko hopi biaha ku ken e doño tabata kasá i konsekuentemente no por saka afó fásilmente ken ta e herederonan.

E situashon di terenonan aki ta imposibel pa yega na un repartishon normal na e herederonan, korte ta bisa.

Tin muchu buraku den e ‘stamboom’, miéntras tur hende ta reklamá nan parti di tereno. E situashon aki a bira un limbo, niun hende no sa unda pa bai.

Esnan ku aktualmente ta biba riba e tereno aktualmente, nan no por laga nada atras pa nan yunan i no por pidi hipotek.

Na aña 2007 a introdusí un lei ku por regla e fenómeno di ‘tera di famia’, p’asina duna esnan ku ta riba e tereno. Pero tin kondishon mará na esaki, esta un di e kondishonnan ta ku mester tin un plan di parsela.

Si esnan bibá riba e tereno aktual, no por kumpli ku e gastunan pa pone e infrastruktura pa e terenonan, Gobièrnu lo hasi esaki i despues lo duna e hende e tereno na erfpacht o sea tereno hür.

Ta trata di terenonan ku nan grandura ta varia entre di 15.000 m² pa 900.000 m². Ta trata di terenonan manera Vrij St. Michiel, Rancho, Vetter, Jan Abel, Vader Sijntje, Noorwegen, Tucacas, Gato, Wanota i Speranza Ariba.

Hues a formulá algun pregunta pa gobièrnu kontesta pa dia 11 di yüni benidero.   Korte ke sa kon ta pará ku e desaroyonan pa ku Rancho i ki dia tin un klaridat pa Rancho.

Hues ke sa pa e otro terenonan kiko konkreto Gobièrnu ta bai hasi ku e repartishon i kua término esaki lo ta kla.

Finalmente Korte ke sa kon Gobièrnu ta mira ku e por solushoná e problemátika aki.

Basá riba esaki, Korte lo fiha un fecha pa yega na un desishon den e situashon ku tei pa añanan largu aki na Kòrsou.