WILLEMSTAD.- E hòmber kurasoleño Inchomar Balentien ku a keda likidá djasabra tras di lomba na Amsterdam tin un historia largu di kasonan polisial i tambe di korte.

Dia 16 di ougùstùs mardugá pa 17 di ougùstùs 2013, mas o ménos 01.15 ora dos pistolero a tira riba Inchomar riba Antwerpenbaan. Segun polis, a los basta bala riba e víktima Inchomar ku a keda gravemente heridá. A  hiba Inchomar hospital pa su rekuperashon. Asina ei mes Inchomar a hui for di hospital ku bala den kurpa. Inchomar a skapa e atentado kontra di su bida ku 16 bala den su kurpa.

Su huida tabata pa e echo ku e tabatin miedu pa nan a likid’é den hospital i tambe no tabata ke a bai será.

Despues polis ta arestá Inchomar ku ta keda konsiderá un tòp kriminal i bon amigu di otro tòp kriminal kurasoleño Gwenett Martha, un aresto ku Inchomar tabata konsiderá komo rehen pa dos luna largu, ora ku outoridatnan hudisial di Amsterdam tin’e será, pa motibu ku e ta nengando komo testigu di bisa ken a intentá kontra di su bida dia 16 di ougùstùs na su garashi di kas na Amsterdam-West.

Outoridatnan hudisial di Amsterdam ta di opinion ku Korte kada bes ta prolongá e detenshon di Inchomar i esaki ta durando hopi, pero fiskal ku tin e investigashon na su enkargo ta konvensí ku Inchomar sa ken ta e persona ku a trata di likid’é. Pues si e bisa ta ken, di e forma aki hustisia ta haña klaridat di e kaso i solushoná esaki. Ministerio Públiko sa ku Inchomar ta na altura ken a trata di likid’é, pa motibu ku e mes a duna esaki di konosé. 

E tempu ei Polis a siguí su pasonan i resultado di 6 luna di tap su telefònnan, despues polis a arestá Inchomar ora e tabata den outo huntu ku dos miembro di famia, direkshon Nijmegen. El a sali Amsterdam.

Den su outo polis a haña un tiki heroina i un tiki hash. Esaki a kondusí na seis entrada hudisial  den kasnan na Amsterdam i a bin haña mitrayur, pistol Glock 30, un pistol Ruger i munishon.

Esaki tabata motibu sufisiente pa tene Inchomar será, loke ku masha dia polis ulandes tabata ke a logra.

For di basta dia e investigashon riba Inchomar a kuminsá, ounke ku no ta muchu kla kiko tabata e motibu ku a kuminsá ku e investigashon kontra di e kurasoleño aki.

Un kos ku a sali na kla for di e prosèsverbalnan ku tin, ta ku nunka polis no a alehá nan mes for di Inchomar. Nan tabata konstantemente riba su lomba i na hopi okashon sin motibu, asina su abogado a reakshoná.

Polisnan ku tabata sigui kòmbersashonnan di telefòn di Inchomar a konstatá ku nan ta papia hopi den kódigo i ku ta bisto ku ta trata aki di negoshi den droga i arma di kandela.

Nan ta hasi hopi menshon di entre otro: e ‘kos’, òf e ‘kosnan’ i e ‘kosnan di man’, ‘oloshi’ i òf ‘outo’, ta keda hopi usá. Pa arma di kandela, pa e marka Skorpion, nan ta usa ‘Scor’, ‘baby’ pa “baby Uzi”, ‘rolie’ pa Revòlver.

Manera ya menshoná djasabra tras di lomba Inchomar no a logra skapa e atentado den su kontra.