WILLEMSTAD.-  No ménos ku 5 partido partisipando na elekshon benidero, esta UN TERSERA PARTI, ta PRO  rekonosementu ofisial di matrimonio sivil pa tur hende. Esei pa nan ta inkluí pareha di mesun sekso.   Ademas 9 partido ta PRO pa bini ku un alternativa pa Matrimonio, ku yama Union Sivil Registrá,. Esaki hustamente  pa parehanan dje mesun sekso tambe. Esei ta MAS KU MITAR di e partidonan. Tur esaki ta resultado di un Enkuesta hasí pa dos periodista profeshonal independiente riba petishon di tres organisashon sekso diverso (LGBTQ) na Kòrsou, i unu di derechi humano.  E  ta un kambio grandi kompará ku 4 aña pasá, ora tabatin algun parlamentario, ma NINGUN Partido sosteniendo rekonosementu pa lei dje bibá di pareha homoseksual.

E Partidonan ku ta pro rekonosementu di matrimonio sivil entre dos hende dje mesun sekso (Igualdat Matrimonial Sivil) ta e partidonan DP, KEM, KUMUN, PIN i VISHON. Tur ta partidonan ku no ta representá den Staten ainda. E partidonan ku ta PRO e forma Alternativo di Union Sivil Registrá, ta e mesun partidonan menshoná, huntu ku e partidonan KOUSA PROME, MAN, PAR I PNP. E último KUATERnan aki ta solamente PRO Union Sivil i NO PRO Igualdat Matrimonial.  E sobrá 6 partidonan den Elekshon di 2021  ta KONTRA di e dos opshonnan.

Resultado dje Enkuesta a keda presentá ofisialmente dia 3 di mart via medionan sosial i komunikado di prensa. Esaki a sosodé den forma di un INDIKADÓ ELEKTORAL, pa yuda e komunidat LGBTQ di Kòrsou, i pueblo en general, vota na un manera informá i konsiente pa nan interes. E Indikadó ta mustra kontesta di e partidonan riba 4 pregunta klave, repartí djariba te abou den:
un sekshon di partido ku ta kontestá tur 4 pregunta ku SI,

un sekshon ku ta kontestá tur ku SI, ménos esun di matrimonio,

un sekshon ku a kontestá ni esun di matrimonio ni esun di Union Sivil ku SI.

Te abou tin dos partido ku despues di un siman di Enkuesta ainda no a kontestá ningun pregunta.

Echo ku 8 partido, esta mas ku mitar dje 15nan, ta PRO trato igual di pareha na Kòrsou, ta algu Istóriko, Kòrda ku for di aña 2015, un veredikto di Korte Oropeo di Derechi Humano ta obligá Kòrsou hasi nèt esei. Ke men, Kòrsou ya tin 6 aña ku e no ta kumpli ku lei internashonal pa ku e punto aki. Esei ta opinion di e 4 organisashonnan ku a pidi e enkuesta, ku ta Igualdat Kòrsou, FOKO, Curacao Gay Pro, i Human Rights Caribbean. Mas Istóriko ainda ta echo ku e Indikadó a keda publiká un dia despues ku Staten di Aruba a aprobá introdukshon di Union Sivil Registrá  pa parehanan dje mesun sekso na Aruba, ku un mayoria di 17 kontra 4 voto.

E 4 organisashonnan outor ta konvensí ku e Indikadó Elektoral lo yuda e Komunidat LGBTQ, i pueblo en general,  hasi un eskoho pa kua partido nan t'ei vota. Na mes momentu e organisashonnan ta kontentu ku, banda djesnan ku ta PRO Union Sivil, tin TANTU partido tambe ku ta PRO Igualdat Matrimonial. Esaki pasobra, segun e organisashonnan, ounke Union Sivil por ta un paso grandi padilanti, Igualdat Matrimonial Sivil ta E opshon ku realmente lo nifiká igualdat kompletu.