...Via di e trali forsa aki, kantidat di e venezolanonan a sali bai for di barak dia 8 di mei último...

WILLEMSTAD.- Ayera hues Martinez a dikta ku e 25 hòmbernan venezolano ku ta será den barak pendiente nan deportashon, por keda será te na momentu ku Korte Oropeo duna su veredikto. Esaki ta e desishon ku hues a dikta ayera djaluna. E grupo di hòmbernan venezolano aki ta forma parti di e grupo di damanan venezolano tambe será pa keda deportá. Djabièrnè último, dia 10 di mei e damanan tambe a pèrdè kaso kontra di gobièrnu.
Den ámbos kaso, tantu e hòmber komo e muhénan a pidi korte pa gobièrnu laga nan den libertat, miéntras nan ta warda desishon di Korte Oropeo si nan por keda deportá si òf no, segun artíkulo 3 di Tratado Oropeo di Derecho Humano.
Sinembargo gran kantidat di e 25 hòmbernan venezolano no ta den barak mas, debí ku nan a “hui” dia 8 di mei último, dor di forsa hèkwèrk dje baraknan i asina a kore bai.
E grupo di hòmbernan venezolano aki dia 11 di mei último nan mester a keda deportá for di Kòrsou. Dia 18 di aprel nan a entregá nan opheshon pa no keda deportá for di Kòrsou, segun artíkulo 3 di e Tratado Oropeo di Derecho Humano. E artíkulo 3 aki ta bisa ku no por deportá un hende pa su pais bèk, si tin e ta kore riesgo ku na su regreso e ta keda maltratá òf torturá. P’e punto aki e venezolanonan a bai Korte Oropeo, kende a pidi partidonan na Kòrsou pa mas tardá dia 23 di mei pa kontesta preguntanan hasi relashoná ku e asuntu di deportashon. Despues di e fecha en kuestion Korte Oropeo lo dikta sentensia.
Dia 23 di aprel e grupo a pidi un provishon pa suspendé nan detenshon.
Hues den su sentensia a indiká ku e venezolanonan dia 11 di aprel 2019 a yega Kòrsou abordo di un lancha, i a pasa pa barak mesora. Dia 23 di aprel Korte Oropeo a bisa ku no por deportá nan pa Venezuela te ora ku dia 23 di mei próksimo partidonan entrega dokumentonan na korte pa difísil si ta deportá nan òf ta suspendé nan detenshon. Gobièrnu ora e desishon di Korte Oropeo a yega, no a bai na ekspulsá e venezolanonan indokumentá.
Mirando ku gobièrnu a bisa ku lo no deportá e venezolanonan te ora tin desishon di Korte Oropeo, hues ta rechasá e petishon pa suspendé nan detenshon. Banda di esaki e venezolanonan no por mustra ku si laga nan liber, ku aki na Kòrsou tin hende ta para responsabel pa nan, manera nos leinan ta dikta. Esaki tambe ta un punto ku ta pone hues rechasá e petishon pa suspendé nan detenshon.

...mr. Steward i abogado Hato ku a hiba defensa na nòmber di gobièrnu...