WILLEMSTAD.-Biahamentu a bira mas kostoso awendia. Banda di e komponentenan tradishonal manera tarifa di kombustibel i otronan, awendia e gastunan pa PCR-test i tambe Antigen-test mester keda añadí na e totalidat di gastunan relashoná ku kada biahe.

Corona vírus a pone ku pa basta luna mayoria kompania di aviashon rònt mundu a stòp tur buelo òf nan tabata realisá solamente buelonan pa transporte di profeshonalnan i tambe merkansia manera kuminda.

Ku basta regularidat por skucha pregunta/komentarionan durante konferensia di prensa di Gobièrnu i tambe riba retnan sosial den kua ta indiká ku e vírus i su variantenan lo ta drenta pais pa medio di esnan ku ta biaha, sea ta hende lokal òf turista. EXTRA a analisá esaki, e hende ku ta biaha, sea lokal òf turista, e por drenta kualke pais sin sinti muchu molèster debí na regla i medidanan pa frena Covid-19?

E gastunan di Covid-test pa un pasahero ku ta sali for di Oropa tabata € 178. Pa loke ta trata Ulanda e último informashon ta ku a kita e nesesidat di un Covid-test despues ku a pone kódigo hel pa Kòrsou, pues e pasahero ta skapa di e gastu ei. Pa loke ta trata Merka si e eksigensia di un Covid-test tei. Na New York e gastu di PCR-test ta $ 195 pa persona. Ta bin aserka ku mester paga bon tinu pa buska e PCR-test na un laboratorio ku por entrega e resultado den 24 òf 48 ora pasobra tin laboratorionan ku ta duna e resultado despues di 4 pa 5 dia. Na Kòrsou e PCR-test ta kosta Fl 159 pues ta un diferensia basta mas abou kompará ku e paisnan ariba menshoná.