WILLEMSTAD.-trahadónan di Damen ta den otro dia den kua nan ta pidiendo klaridat di e kompania Damen, despues ku a Sali na kla ku Damen lo no paga trahadónan bónus e fin di aña aki. Gerensia di Damen a reuní ku dirigentenan sindikal di PWFC ayera i awe e lidernan sindikal ta papiando ku e trahadónan pa splika tur e detayenan ku gerensia a trese dilanti durante di e reunion ayera.

E astiero di Kòrsou konosé tempunan bastante difísil pero a mira un lus positivo na momentu ku Damen a tuma e operashon di Dòk. Kosnan a kana relativamente bon te na momentu ku e luna aki a bira konosí ku Damen lo no paga bónus na su empleadonan. E trahadónan mesora a kuminsá hasi e konteo kuantu barku nan a traha riba dje apesar ku e pais aki i mundu ta pasando den un pandemia.

E situashon a bira mas kritiko na momentu ku e trahadónan a komprondé ku Damen lo a apliká atrobe pa e areglo di gobièrnu di NOW. Esaki ta impliká lógikamente ku na momentu ku Damen apliká pa NOW outomátikamente e trahadónan lo bai kobra por lo ménos 20% ménos na salario. Na opinion di trahadónan no tin nesesidat pa e kompania ta pidiendo NOW mirando kuantu trabou tin i tabatin.

Keda pendiente pa mas detaye ya ku na e momentunan aki di mainta e sindikato ta dunando informashon, bou di ora di trabou na e trahadónan. Lamentablemente no por duna e otro banda debí ku Damen no ta reakshoná riba petishon pa duna klaridat