WILLEMSTAD.- Entrante yüni 2024 tur dunadó di trabou por risibí informashon/dokumentonan di Banko di Seguro Sosial (SVB) via e-mail. Pa esaki SVB mester di un e-mail di e kompania òf di e kompania ku ta hasi atministrashon pa e komersiante. Naturalmente mester trata di un e-mail ku ta aktivo i ku e kompania ta usa regularmente.
Por yena e formulario optenibel riba página di Facebook SVB, wèpsait www.svbcur.org òf Instagram.
“Aanslagen”
Den artíkulo 8 di e lei ku ta regla seguro di malesa i aksidente (zv/ov) ta indiká ku si e dunadó di trabou no paga prima kompleto òf parsialmente denter di e término preskribí, por kobra e prima no pagá òf parsialmente pagá pa medio di un “aanslag” na e dunadó di trabou, basta e debe no surpasá 5 aña.
Pa hasi e proseso di kobransa mas rápido i efisiente, entrante yüni 2024 SVB lo manda e ‘aanslag’ di luna i aña di e lei di zv/ov via e-mail. Pa esaki SVB mester di un e-mail di e kompania òf e kompania ku ta hasi atministrashon pa e komersiante. Naturalmente mester ta trata di un e-mail ku ta aktivo i ku e kompania ta usa regularmente.
Via e link (https://svbcur.org/werkgeversemailregistratie/) por yena i aktualisá bo informashon asina entrante yüni bo por risibí tur “aanslag” via e-mail. E link ta keda riba SVB su página di Facebook. Asina por hasi kambionan ora ta nesesario. SVB ta pidi pa doñonan di trabou suministrá mas pronto posibel nan informashon.
Tambe SVB ta pidi pa tene kuenta ku “aanslag” di aña tin informashon di entrada di trahadónan. Pa e motibu aki ta rekomendá pa duna e e-mail di un persona di konfiansa i no un e-mail ku otronan ku no mester haña e informashon tambe tin akseso na dje.
E prima
Pa e lei ku ta regla seguro di malesa (zv) mester paga un prima di 1.9 porshento di e salario di e trahadó. E dunadó di trabou mester paga e prima kompleto.
Pa e lei ku ta regla seguro di aksidente (ov) ta paga un porsentahe ku ta dependé di e klase di rísiko (“gevarenklasse”) na kua e kompania ta pertenesé. E porsentahenan di e rísiko ta varia di 0,5 porshento (mínimo) te 5 porshento (máksimo). E prima aki tambe e dunadó di trabou mester pag’é kompleto.
Pa mas informashon por yama/app via 4344000.
