Segun presidente di STrAF

WILLEMSTAD.- Informashon privá di siudadanonan ta na peliger. Na e konklushon aki presidente di sindikato STrAF, Juan Lourens  ta yega despues di a tuma nota di ekspreshonnan riba ret sosial di minister di Finansa, Javier Silvania.

Despues di e anunsio di minister Silvania ku trahadónan di servisio di impuesto no por haña fakansi miéntras no kaba e trabounan pa paga 70 porshento di restitushon promé ku Pasku awor, a surgi un diskushon entre e minister i representantenan sindikal manera entre otro ABVO i  STrAF. E sindikatonan a mustra ku e minister mester splika kiko ta pasa ku dianan di fakansi di 2023 ku e ámtenarnan tin aden ainda, pasobra nan no por pasa ku nan bai 2025.

E minister konsekuentemente a laga sa na promé instante ku ta ABVO i STrAF ta stroba e proseso pa por saka “aanslag”  paga restitushon, despues e minister a laga sa ku ta STrAF ta stroba ámtenarnan di duana pa kobra restitushon i al final a bisa ku restitushon di un lider sindikal a wòrdu pagá kaba. “Kiko e tin kunes ku abo a kobra kaba. Sigui bo sostené.”

No solamente e minister ta instigá miembronan kontra nan lider sindikal, pero mas peligroso ainda, Lourens ta bisa, e ta saka informashon privá i di hende benta riba kaya. Un akto kontra lei. “Ta opvio ku ta na mi persona e minister a referí ku su ponensia”, Lourens ta deklará

E loke Silvania a hasi ta pone Lourens komprondé mas mihó ainda dikon dòkternan di kas no ke pasa informashon konfidensial di nan pashèntnan pa e “Huisartsenpost”, HAP. “Ta e kosnan aki ta sosodé. Ta bai buska informashon privá di hende i benta nan riba kaya komo manera pa tuma represaya. Tin trahadó ku ta kana ku shimis i sapatu hilchi haltu bistí, pero loke nan ta hasi ta buska informashon konfidensial di hende pa pasa esaki pa polítikonan.”

Solushon

Mas aleu e lider di STrAF ta splika ku ta trata di un grupo di 6 trahadó (“aanslagregelaars”) ku mester hasi trabou di entre otro saka “aanslag”, kalkulá restitushon i yega na areglo di pago pa personanan ku ta bandoná pais. Un trabou mester di alrededor di 20 persona pe i ta lógiko ku e ámtenarnan no ta logra e “target” ku a a pone pa nan, esta Lourens.

E ta kuestioná tambe dikon e minister no ta sòru pa tin sufisiente personal pa hasi e. Na opinion di Lourens empleadonan públiko ta haña nan inhustamente den e situashonnan aki pasobra e minister tin un guera ku hefe di servisio di impuesto i ku Ontvanger. E ta mustra ku for di momento ku Silvania a bira minister públikamente el a ataká e hefe di servisio di impuesto i Ontvanger i ke a kore ku nan.

Pero debí ku ainda e no a logra ta empleadonan públiko ta esnan ku ta sufri den e guera ku a kontinuá entre e minister i e hefenan di servisio, esta Lourens. Relashoná ku ponensianan di e minister ku ta un sistema outomatisá tin ku ta kontrolá tur “aangifte” di impuesto promé ku saka “aanslag”, Lourens ta bisa ku ta konosí ku e sistema outomatisá no ta funshoná i ku ta pa e motibu aki e ámtenarnan mester kontrolá na man pa evitá ku sea ta kobra e pagadó di impuesto di mas òf ku ta duna di mas bèk na restitushon. Silvania mes den pasado a reklamá su antesesornan ku a paga un suma mionario na e kompania Bearing Point pa un sistema outomatisá ku no ta funshoná, Lourens a sigui bisa.

Si ta únikamente via e sistema outomatisá aki e minister ke tòg pa kontrolá tur “aangifte”, e mester manda instrukshon pa e hefenan di servisio, esta Lourens. “Di e forma aki no mester di ni e 6 ámtenarnan aktual ku ta traha komo ‘aanslagregelaar’. Por laga 1 ámtenar so hasi e trabou di primi un kònòpi riba kòmpiuter pa aprobá tur loke e sistema outomatisá a kalkulá.”

Foto:

...Juan Lourens...