WILLEMSTAD. - Resientemente Korte Sivil a dikta fayo den un kaso, kaminda ku un persona ku tabatin un “website” i ku a bai bankarota pa e rektifiká informashon eróneo ku el a pone riba su “facebook” difamando un kolaborador di un Parlamentario di e gobièrnu anterior.

Tabata 17 di aprel 2017 pa 5.43 di atardi ora ku e persona enkuestion a publiká riba su “facebook” un seri di informashon inkorekto i difamatorio di e kolaborador di e parlamentairo.

El a pone ku e kolaborador tin un pasaporte mèksikano falsu, el a bisa tambe ku e kolaborador no tin un prueba di bon kondukta di niun pais. E kolaborador no tin pasaporte ulandes i mester puntra outoridatnan kon bin e ta na Kòrsou. E tabata será na Líbano, pa motibu ku el a keda gará ku koka den su maleta for di Colombia. El a kue hustisia Líbano kabes abou, dor di hasi manera e ta malu i asina a logra hui. Ketu bai e ta keda buská na Líbano pa outoridatnan hudisial. Di e forma aki el a pèrdè su pasaporte Líbano i aki na Kòrsou el a kue algun hende kabes abou dor di froude.

E no a ni kaba skol básiko, pero ta kana rònt ku un diploma di universidat. E tabata metí tambe den kontrabanda di alkohòl i sigaria.

Aki na Kòrsou asta tin un keho den su kontra di parti di su kasá na Líbano pa maltrato severo.

Esakinan tabata e informashonnan ku e persona enkuestion ku hopi konfiansa a pone riba su “facebook” i a “tag” un kantidat grandi di hende inkluso un  periodista “freelance”.

E persona enkuestion a sintié tachá den su bon nòmber i a entamá un huisio sumario kontra di e persona ku a pone e informashonnan riba “facebook” pa e rektifiká.

E persona a reakshoná ku e no por atendé e kaso den korte pa motibu ku e ta un hòmber ku a bati bankarota i no tin sèn pa paga abogado i ku a pidi pa no ehekutá un multa riba su persona.

Korte a trata e kaso i mas ku klaro e persona a pèrdè e kaso i mester rektifiká e informe ku el a publiká i hues a formulá e teksto ku e persona aki mester pone riba su “facebook” i e tin di “tag” tur e hendenan ku el a  “tag” dia el a pone e informashonnan difamatorio riba su “facebook” i si e no kumpli e tin di paga un multa te ku 2000 florin.

E tin di paga tambe tur gastunan di korte na un balor di 1.887,95 florin.