...Manera nos a primintí siman pasá, e siman aki nos tin e di dos parti di Ostpùnt. Einan por a mira ku e presensia di inglesnan na aña 1800 ainda ta visibel. Edifisionan ku arkitektura ingles/eskoses tei para intakto.

Inglesnan na Kòrsou....

Inglesnan a poderá di Kòrsou na 1800 pa 1803. Durante di siglo 17 i 18 Ulanda i Inglatera tabata konstantemente den guera ku otro pa e teritorionan Nort i sùit Amérika. I na 1800 ora na Ulanda tabatin e guera, e inglesnan a mira nan oportunidat pa apoderá di Kòrsou.

Na 1806 manera ta bisa “de kogel is door de kerk” nan a bolbe kita e isla i a keda 10 aña kuné. Esei e parti atministrativo polítiko. E inglesnan semper tabata interesá den e parti di fòsfat. Te tabata trese sèn. E fòsfat mes tabata yuda nan ku e guera trahando pòlvo pa tira pero tambe tabata us’é den agrikultura. Te ainda e fòsfat ta keda algu úniko.

Lokomotif ainda visibel....

Emlyn Pietersz di One Curaçao a duna nos algu di konosé di e área aki. Siman pasá nos a papia di e awa kurativo i awe nos tin e presensia di inglesnan. Algun ku a hala nos atenshon na restunan di un lokomotif. Tin un wagòn aki i otro aya. E tempu ei, esta den siglo 18 tabatin riel kaminda tram tabata kore pero tambe kabai ku tabata hala wagònnan ku tabata pasa riba riel. Riba prenchinan bieu den archivo nashonal por tuma nota di esaki.

John Godden tabata e ingles ku a sòru pa laga atras edifisionan históriko. Segun Emlyn a splika, e mesun tipo di ofisionan estilo ingles aki por haña tambe na lanthùis Jeremi. Por rekonosé e arkitektura ingles aki na e rant di bentana i porta, kaminda semper e ta rondoná i dekorá ku baksteen. E edifisionan a keda konstruí ku pidanan di laman di kap, a duna nan forma i nan a keda hopi bunita hinká den otro pa forma e edifisio.

Rembak di aña 1879....

Riba e tereno na Ostpùnt tambe tin un rembak trahá ainda estilo di ántes. E ta datá di 1879. Pafó e ta manera un kas pero paden ta kaminda pa almasená awa i di einan, promé ku kos a bira moderno, tabata distribuí e awa na e diferente pòstnan. Tabatin hende ta traha diferente parti di Ostpùnt i nan no por a sali fásilmente. Ta kada tantu nan ta sali pa bai kobra. Ta netamente riba e área ei na Ostpùnt sindikalismo a forma. E trahadónan tabata ke un tiki mas fleksibilidat espesialmente pa wak nan famia. No tabatin outo i pa keda tantu tempu den e trabou tabata difísil. Esaki a pone ku ta e muhé di kas tabata bai kobra e sèn. E awa den e rembak tabata usa pa henter e área. Aki tambe e arkitektura ta esun estilo ingles/ eskoses.

Santana...

Un santana hopi bieu tambe kaminda tabata dera inglesnan. Te ainda ta visibel sigur tres graf ku piedra i nòmbernan riba nan ainda bon kla visibel riba dje. I Emlyn a enfatisá aki ku Kòrsou ta un isla di selebridat. Si bai santana na Betheim i Altena por mira graf di hende di Polen derá. Entiero na Kòrsou semper ta algu sagrado te awe. Kòrsou tabatin mayoria santana kaminda tabata duna hopi honor. I den e santana aki na Ostpùnt ta hendenan di Scotland. E santana aki ta estilo di hudiu. No tabata sera e hendenan den kaha pero abou na suela.

Misa....

Nos por a tuma nota di un misa den hopi bon kondishon. E ta trahá na 1880. Su panchinan di dak ta diferente di loke ta usa awendia. Nan ta ku punta i ta sinta presis riba otro. No ta algu ku por wak fásilmente niun otro kaminda na mundu.

Un pida historia....

For di 1634 Kòrsou tabata teritorio kontrolá pa West Indische Conpagnie. Despues di fayesimentu di WIC na 1791, Kòrsou a bira parti di reino di Ulanda. Ulanda den e periodo ei tabata den e promé guera napoleonistiko na Oropa (1792-1797). E guera aki pa gran parti a tuma lugá riba teritorio ulandes. Ulanda a keda invadí pa Fransia i alkalde Willem V mester a hui bai Inglatera na 1795.

Debí na e guera aki i e invashon di Fransia, Ulanda no tabatin mas trupa pa por a protehá su teritorionan i asina Inglatera a haña nan chèns pa por a invadí Kòrsou i e otro kolonianan ulandes den Karibe na 1800.

Pero despues di 3 aña e pueblo di Kòrsou a lanta i a kore ku a inglesnan i Ulanda a haña e maneho bèk na Kòrsou. Despues na 1806 e inglesnan a bolbe apoderá di Kòrsou i a keda te 1816 na poder. I ta te ora na 1815 a kaba ku Napoleon den Waterloo, Gran Bretaña a duna Ulanda e isla di Kòrsou bèk. Esaki a sosodé den tratado di Paris.