Semper: Kòrsou no ta haña AstraZenica

WILLEMSTAD.- Dr. Jerry Semper na kabes i e tim di bakunashon di Kòrsou a duna splikashon riba e echo ku Kòrsou ta bai bakuna ku e bakuna di Moderna tambe banda di Pfizer. Durante di último seis siman a pidi konfiansa di komunidat i a pidi tur hende pa skucha e informashonnan i komprondé loke ta pasando. Sinembargo ta manera ‘Colon a kima’, asina Semper a bisa.

Na vários okashon a bini e pregunta si Kòrsou ta sigui haña mesun marka di bakuna i e kontesta tabata si. Semper a enfatisá ku esei tabata e informashon ku nan tambe tabata haña den deliberashon ku outoridatnan. Sinembargo den pandemia kos ta kambia. E médiko a bisa ku kisas por a krea e impreshon ku ta Pfizer so Kòrsou ta sigui hana, pero tin videonan den periodonan anterior ku a mustra kaba ku lo bini mas marka di bakuna.

E pandemia a sigui krese i mortonan a subi i p’esei mester a kambia strategia. Manera ta konosí Kòrsou ta haña alrededor di 18 mil bakuna kada dos siman, pero teniendo kuenta ku ke bakuna mas tantu hende a bai deliberá ku Ulanda. Echo ta ku tin skarsedat di bakuna mundialmente. Den e kaso aki a pidi Ulanda pa Kòrsou haña mas bakuna pa kumpli ku e kantidat di bakuna ku ta dunando e poblashon. Ulanda a bai di akuerdo pa manda mas bakuna. Kòrsou ta haña 65000 bakuna.

Premier den deliberashon ku Ulanda a pidi pa no manda AstraZenica. Pues Moderna ta ok, pero Kòrsou no ke AstraZenica.

Semper a pidi komunidat pa sigui konfia den loke e ta splika. E ingrediente importante den e bakuna ta MRNA i esei ta igual den tantu Pfizer komo Moderna.