WILLEMSTAD.- SER no ta komprondé dikon e inisiativa di lei pa habri oportunidat pa profeshonalnan hóben lo no konta pa personanan ku a yega 30 aña, aunke e lei riba su mes ta bon intenshoná. T’asina ku pa prinsipio dje aña aki SER a risibí e inisiativa di lei aki pa konseho di parti di frakshon di MFK. Pa medio di e lei aki no solamente ta krea partisipashon pa hóbennan, pero tambe ta krea e posibilidat di duna eksonerashon di loonbelasting i primanan sosial pa e grupo en kuestion.

E inisiativa di lei aki ta boga pa promové  partisipashon di hóbennan profeshonal unda modernisashon di Lei di Bion i harmonisashon di e rekargo fiskal riba overtaim ta para sentral.

Den e inisiativa di lei ta duna un definishon na esnan ku ta bini na remarke, kual nan ta residentenan di Kòrsou ku tin 18 aña di edat pero ku ainda no a alkansá edat di 30. Pero SER lo ke sa a base di ki konsiderashonnan lo ekskluí personanan di 30 aña i mas.

Awor aparte di e límite di edat, e trahadó lo mester tin un akuerdo di trabou pa tempu indefiní, òf un akuerdo di por lo ménos seis luna, unda tin un plan di estudio inkluí. Ademas e persona ei no mag di gana un salario bruto di mas ku fl. 32.304.- pa aña.

Ademas SER ta sugerí esnan ku a presentá e inisiativa di lei aki pa remplasá e palabra “young professionals” pa un otro ku ta mas funshonal, esei pa evitá ku lo krea e impreshon ku ta hóbennan ku sierto nivel di estudio so lo por bini na remarke pa e insentivo aki. E ta sugerí pa usa e términonan “hóben i hóben adulto”.

E intenshon a pa promové empleo pa hóbennan di 18-30 aña den kual ta duna eksonerashon riba loonbelasting i primanan sosial. Pero e primanan sosial ku ta kai bou di e eksonerashon ta di parti di e dunadó di trabou, ku ta AOV, AWW, AZV, AVBZ, OV i Cessantia.

Pero e dunadó di trabou lo por bini na remarke pa e eksonerashon den kaso ku e sera un akuerdo laboral pa tempu indefiní òf pa por lo ménos seis luna i na un salario bou di fl. 32.304.- pa aña.

E meta di e lei aki ta pa krea kuponan di trabou duradero pa hóbennan. Pero den e mesun rosea e ta papia tambe di sanshon den kaso di inkumplimentu. E ta bisa por ehèmpel ku e eksonerashon lo bira inválido ku forsa retroaktivo den kaso ku terminá e akuerdo laboral denter di seis luna i sin ku esaki ta falta dje trahadó.

E sanshon ta enserá konkretamente ku e dunadó di trabou lo tin di paga tur e prima i belasting ku a ser eksonerá den e periodo. Tambe e lo pèrdè e eksonerashon den kaso ku konsientemente e duna informashon robes òf keda sin duna informashon.