WILLEMSTAD.- Esaki ta Kaya Mila na Skèrpènè algu pariba di Rancho de Herberg, kaminda ku habitantenan di den e área, por sierto indigná a aserká Extra pa splika di un situashon  realmente tristu i inkreibel.

Apénas algun dia promé a limpia e kaya aki limpi limpi, a kap mata i piki tur sushi tira afó, pa despues, figuranan asosial ta pasa i tira sushi netamente kaminda ku a kaba di limpia. Miéntras ku awor aki tin tur posibilidat pa tur hende tira nan sushi afó grátis na landfill, tòg tin elementonan ta pasa i tira sushi kantu di kaya, habitantenan ta enfatisá.

Tur kos ta indiká ku ta trata di hendenan sin mente, o sea kabes bashí, pa motibu ku e akshon aki ta insólito.

Habitantenan di den e área a hasi e pregunta, kon nos mes ku ta biba riba e isla aki ta hasi e tipo di kosnan manera esaki ku su pais. Por mira televishon, paña, panchi, wea tur sorto di kos ku lo tabata di mas den un kas a haña un lugá kantu di kaya, pa otro hende pasa hisa nan.

Segun e habitantenan, ta parse ku tin hende ku no ke mira Kòrsou limpi, pues un situashon tristu.

Esaki ta un di e bèrgwensa nan ku Kòrsou ta pasa aden regularmente ta ku e isla aki ta sushi. Den kombersashon resientemente ku un taksista, el a splika ku turistanan ku ta bishitá Kòrsou ta ekspresá ku Kòrsou ta un bunita isla ku playanan impreshonante. Dos aspekto ku a hala nan atenshon ta ku Kòrsou ta hopi sushi i hopi kachó riba kaya. Problemanan ku pa añanan Kòrsou ta bringa kuné sin por dominá.