El a keda sorprendí

WILLEMSTAD.- E akusado D.S.(21) a keda sorprendí, na momento ku el a tende ku e tin ku bai sera pa 96 dia.

Ministerio Públiko a pidi wes, pa ehekutá e kastigu ku tin kologá riba su kabes.

E akusado a keda kondená na aña 2022  pa un echo kastigabel ku el a kometé.

Pa ku esaki el a haña kastigu kondishonal i mester a kumpli ku  140 ora di trabou pa komunidat, pero nunka a presentá.

Esaki a kondusí na konsekuensianan serio i ku awor e akusado mester bai sinta e dianan ku e no a kumpli, ku loke e veredikto a bisa.

Wes a relatá ku a manda vários karta p’e, pero sin resultado. E no a presentá i a bolbe manda karta. A yam’e telefónikamente i  traha un sita kuné, pero atrobe sin resultado.

Segun wes mas aleu, a bolbe hasi yamada, di kual e dia ei e akusado a bisa ku e ta malu i no por presentá. El a primintí di trese karta di dòkter pero esaki tampoko a resultá. Instansianan konserní a bolbe purba, pero atrobe e akusado no a responsabilisá su mes.

Durante tratamentu di e kaso el a bisa ku e sa ku el a faya pero ku e bia aki si e lo sòru kumpli. Fiskal a mustra wes riba e tantísimo bianan ku a duna e akusado un chèns i a bisa ku no tin siguransa ku awor si e lo kumpli.

Tambe fiskal a bisa ku awor si e no ta haña ku akusado meresé niun chèns mas i ta pidi hues pa lag’e bai sinta e 96 dianan den prizòn.

Segun rapòrtnan di profeshonalnan, a purba tene kontakto un kantidat di bia ku e akusado, sin resultado. Nan a papia kuné i purba gui’e tambe den pasado, tambe sin resultado. Nan tampoko ta haña ku e meresé mas chèns, mirando ku ni un dia el a presentá pa kumpli ku su orarionan.

Wes a bisa e akusado  ku tendiendo esakinan, no a ked’e nada otro di ehekutá e kastigu kologá riba su kabes.