WILLEMSTAD.- Korte a kaba di dikta djis algun minüt pasá ku ta duna e kompania di aviashon lokal Insel Air un espasio adishonal di un aña i mei mas pa loke ta trata e suspenshon di pago. Wes a indiká ku durante di e periodo di un aña i mei lo tin dos momentu ku wes ta evaluá si Insel Air ta logrando den e meta pa baha su gastunan. E fechanan ta stipulá kaba, esun promé ta 30 di òktober i 30 di desèmber.

Anteriormente e situashon di e kompania di aviashon a yega na un límite ku no por a kumpli ku su obligashonnan. Pero tabata momentu tambe ku tabatin hopi esfuerso tumando lugá pa logra un partner stratégiko ku lo mester nifiká salbashon di e kompania i mas ainda mantenshon di kupo di trabou.

Korte e tempu ei a bai di akuerdo pa duna un suspenshon di pago (surseance van betaling) i asina duna espasio pa negoshá den mas trankilidat. Keda pendiente pa mas detaye den próksimo edishon di EXTRA.