WILLEMSTAD.- Nos no por sigui drumi, sperando ku e pandemia di COVID-19 lo pasa un dia i ku despues tur kos lo normalisá. Mayornan ban stòp di papia. Ta ora pa nos pone pia abou pa kosnan por kuminsá kana den enseñansa.

ReMaUni ta bisa ku komo mayor ku yu(nan) den enseñansa, nan mester ta alerta. Kada un di nan mester ta konsiente di e situashon di hopi insertidumbre i preokupashon ku enseñansa ta pasando aden.

Nan tur sa ku no ta tur mayor ta bon na altura di tur lokual ta pasando na nos skolnan. Di otro banda basá riba invertarisashon ku ReMaUni a hasi di yamadanan ku nan a risibí pa basta tempu kaba, nan sa tambe ku tin hopi mayor preokupá i asta bibando den un insertidumbre grandi pa motibu di e situashon aktual di nos enseñansa. E pregunta esensial ku kada un mester hasi ta: Kon pa minimalisá e impakto enorme di COVID den nos enseñansa?

Diariamente un kantidat grandi di mayor desesperá ku enseñansa di nan yunan i tambe ku problemanan sosial i emoshonal ta tuma kontakto ku ReMaUni. Den e kuadro aki awor mas ku nunka, komo representante di mayornan, ReMaUni ke invitá tur mayor ku tin yu(nan) den nos enseñansa aktual pa djòin den nos próksimo ‘zoom meeting’.

Durante di e ‘meeting’ aki ke duna mayornan e oportunidat pa trese nan preokupashon i nan insertidumbre dilanti, pa asina ReMaUni bai inventarisá i duna oido na lokual mayornan ta eksigí pa ku enseñansa di nan yunan den e normal nobo. Pa por hasi esaki mester di kada mayor su aporte.

‘Mayor nos MESTER ban uni forsa i ban traha huntu na bienestar di enseñansa di nos yunan. Komo mayor responsabel ku tin enseñansa di bo yu(nan) na pechu, duna bo aporte partisipando na e ‘zoom meeting’ di djaweps awor dia 22 di aprel 2021 di 7 or pa 8or di anochi”, presidente di ReMaUni Mirugia Nowels Wieske ta bisa.

Pa kualke pregunta i/o remarke i pa bo por risibí e link di e ‘zoom meeting’ por tuma kontakto ku ReMaUni na nos number di WhatsApp +5999513-4214 òf via e-mail remauni@gmail.com.

Mayornan kòrda ku: Enseñansa ta garantisá ora mayornan tambe partisipá.