WILLEMSTAD.- Ayera durante di un kontròl rutinario, funshonarionan di MEO a konstatá otro aktuashon insólito i inkreibel na un minimarket situá na Tera Kora. Na yegada di e funshonarionan na e minimarket a yega i topa ku un saku di plèstik kual tabata yená ku aros i ku preis ariba.

Ora a puntra e propietario kiko esei ta, el a indiká ku ta pa su propio uso. Pero ora a bai kontrolá mas aleu a haña 19 di e mesun sakunan aki den rèki poné pa bende.

Pues e doñonan a kumpra saku di aros grandi i yena nan den saku chikí.

Hefe di Departamento di Inspekshon Ekonómiko Ronny Cornelis a indiká na EXTRA ku e akto aki ta inaseptabel. No por ta asina ku ta bende konsumidónan algu ku no tin ningun etikèt riba dje. Esun ku mester kumpra e aros no sa ku ta aros bon e ta kumprando òf aros vensí. Mirando esaki a konfiská tur aros i sera e minimarket te próksimo aviso.

Cornelis ta keda pone énfasis pa tur konsumidó ku topa ku e tipo di situashon ‘no-normalnan’ aki pa tuma kontakto ku e number di telefòn di MEO; 511-1444 i kumpra konsiente.