WILLEMSTAD.- Inspekshon kombiná i UO G&GZ a bishitá sentro di Kuido Jurmelene pa investigá e situashon aki. Den kuadro di investigashonnan rutinario den kasnan di hende grandi, inspekshon di salubridat ku UO di Medisina i Asuntunan di Salú, a bai hasi investigashon rutinario riba kas di grandi Sentro di Kuido Jurmelene na Juan Hato.

Durante e bishita, a sali na kla ku e atenshon médiko na e abitantenan ta den òrdu, pero ta nesesario mehorá e atenshon di enfermeria riba algun punto, falta personal i tambe e personal falta entrenamentu adishonal.

E aspekto higiéniko di e kas, e kushina i e kamber di drumi tambe mester di mehorashon. E kushina tin mester di algun kambio manera instalashon di nèt kontra sangura, baki shushi i mehorashon di iluminashon.

E tereno mester ser limpiá. Tin ku duna mas atenshon na seguridat di e kas pa mayornan manera mas balustrada riba e sala, pone e tualètnan na altura òf tualètnan ku nan por subi, mas iluminashon i un sistema di ventilashon pa e baño, i ta mihó pa konsentrá e kas di grandi riba un solo piso, asina ku hende no mester subi trapi.

E dokumentonan nesesario mester ser adaptá i despues di terminá nan mester ser mandá pa Inspekshon di Salubridat Públiko i UO G&Gz. Ademas, ta urgente pa inisiá un programa pa kontrolá insekto i pone bòternan di gas pafó. E instansia a ser informá tokante tur e puntonan di akshon relashoná ku e konstatashonnan.