WILLEMSTAD.- Segun Inspekshon di Belasting i Bearingpoint ta pone “aanslag” di Inkomstenbelasting masal pa djaluna awor. Esaki ta alrededor di 51.000 “aanlag’ ku lo saka, i ta mas òf ménos 75% di e total. Esaki ta loke ku minister di finansa sr. Javier Silvania a indiká riba su página di facebook. Tambe el a hasi petishon na tur hende pa informá su persona pa medio di su Facebook página si a risibí e “aanslag” di Inkomstenbelasting. El a terminá ku e frase aki “minfin is watching”.

Mesora esaki a lanta bastante reakshon di parti komunidat riba e minister su página di facebook.

Hopi persona a indiká ku ta for di dos siman pasá nan a haña karta di “aanslag” di Inkomstenbelasting di 2019, pero  a keda di notifiká na nan ki dia e pago ta subi nan kuenta bankario.

Manera ta konosí den luna di novèmber a surgi henter un konmoshon rondó di Inspekshon di Belasting i Bearingpoint debí ku e  programa ku ta usa pa atendé ku “aanslag” nan di Inkomstenbelasting tabata funshoná solamente pa 5% dje total di “aangifte” nan.

P’esei minister Silvania a duna enkargo na SOAB pa investigá e “software” di BearingPoint na Inspekshon Belasting. SOAB mester a investigá e proyektonan Multi Tax Solution (MTS) i Multi Collection Solution (MCS) di BearingPoint ku ta den funshon na kantor di impuesto.

Den un reunion, minister di finansa sr. Silvania a habri afó formalmente kontra di e hefe di Inspekshon di Belasting komo Bearingpoint, pasobra gobièrnu a paga BearingPoint alrededor di 20 mion florin pa e software for di 2015, i te ainda e sistema no ta funshoná optimalmente.

Na final dje reunion, minister a duna Bearingpoint i Inspekshon di belasting ultimatum, ku pa 31 desèmber 2021 tur “aanslag” di 2019 mester a keda poné.

Pa basta dia kaba siudadanonan a kuminsá keha minister di finansa ku pregunta unda nan “restitutie” di 2019 a keda, pasobra ainda kantor di impuesto no tin fin di paga. A resultá ku ta un grupito so a haña restitushon di 2019.

Minister Silvania a kontestá siudadanonan riba su página di facebook ku di siguiente forma:“Si dentro di 2 siman e problemanan tékniko no keda solushoná, MinFin (Minister di Finansa) lo pone un konferensia di prensa kaminda hefe di Inspekshon i ontvanger i BearingPoint lo tin ku bin duna pueblo di Kòrsou kuenta i rason”.

Mas aleu e minister a skirbi riba su página di facebook ku Gobièrnu a paga Bearingpoint miónes pa traha e sistema di Adaf (Sdministratieve Afdoening), kaminda e kòmpiuter mes ta kontrolá e “aangifte” i pone “aanslag” pa inkomsten- belasting. Te dia di awe Adaf NO ta funshoná.

Amtenarnan mes ta kontrolá “aangifte” ku man 1 pa 1. Ta p’esei Inspekshon a pone tiki “aanslag” IB pa 2019 i 2020 ainda. “Awor bo ta komprondé dikon bo no a haña “restitutie”, e minister a indiká. E software por a prosesá solamente 5% di e “aangifte” nan. Pues awor e minister a anunsiá ku lo pone “aanslag”, pero esnan ku tin di haña restitushon si nada di sèn ainda riba nan kuenta.