WILLEMSTAD.- Inspekshon di Salubridat a bishitá dos kas di grandi, i e resultado ta ku ámbos kas di kuido tin kos di drecha. Esun mas ku e otro. Ta trata di un investigashon di rutina ku Inspekshon di Salubridat ta tene na kasnan di kuido konhuntamente ku UO i departamento di asuntunan di salubridat. A bai e kas di grandi “House of Agatha Foundation”. Durante bishita na e kas di grandi aki a konstatá ku nan ta kumpli ku bastante rekisito manera e kuido médiko na e abitantenan ta hopi bon; dokumentashon médiko ku informashonnan nesesario tambe ta kompleto; maneho di medikamentu tambe ta bon; tin sufisiente personal, i alabes ta hasi sufisiente aktividat ku e klientenan. Otro bon punto ta ku tin un eksperto pa e aspekto di kuido. Un instansia konosí ta sòru ku kuminda pa e kas di grandi aki. E higiena general di e kas di kuido a laga impreshon positivo riba inspekshon. Pero nan tin kosnan chikí pa drecha manera entre otro den bañonan mester di mas iluminashon, sistemanan pa tene na murayanan i tambe den gangnan. Den kushina falta e “waya” pa muskita. Pues e kas di grandi aki tin di bai traha mesora riba e puntonan ku falta di atenshon. Pues un kas di grandi ku ta kumpli ku tur kondishon.
E di dos kas di hende grandi ku a bai ta High Quality Care. Na e kas di grandi aki si, kosnan no tabata na òrdu. No por a kontrolá kuido médiko di e abitantenan, pasobra e dokumento di kuido di e klientenan no tabata den e kas di kuido aki. Dòkter di kas ta bishitá e instituto aki riba indikashon; no tin un maneho i kontròl di medikamentu; i falta hopi medikamentu, miéntras no tin un eiskast apart pa remedi manera insulina. E kantidat di aktividat ku ta tene ku e grandinan tampoko ta sufisiente. E kuminda tabata na smak di e klientenan ounke no tin un dietista. Ta pone mas atenshon na prioridat di e kas di grandi ku e kuido di e klientenan. Pa loke ta trata kushina di High Quality Care, tabatin vários punto di atenshon, entre nan limpiesa di kushina i eiskast, falta di waya kontra muskita, i vários otro punto mas ku mester drecha. Tin kosnan den e kushina ku no mester ta ei den i asina ta hasi e kushina un lugá fo’i òrdu, mester di mas iluminashon den bañonan i den e tualètnan i vários parti di e kas di kuido pone aparatonan di sosten na muraya. High Quality Care di inmediato mester bai drecha tur loke ku ta robes.