WILLEMSTAD.- Mester atendé ku e dòkter di kas individualmente ku no ta atendé ku regla. Esaki segun e asosashon di dòkternan di kas, reakshonando riba reklamo den prensa kontra di dòkternan di kas ku no ta alkansabel i ku e pashènt ta bai poli di CMC riba su mes.

Direktiva di asosashon di dòkternan di kas (CHV) a tuma nota di un artíkulo den prensa i ta lamentá e ponensia ku dòkternan di kas lo no ta kumpli ku nan responsabilidat pa ta alkansabel i duna kuido.

CHV mes lo hasi investigashon riba e motibunan ku pashèntnan ta dirigí nan mes direktamente na sala di emergensia sin konsultá dòkternan di kas promé. E problema ta konosí pa CHV i a pidi CMC den un periodo anterior pa duna sifra kualitativo pa asina yega na un solushon konhunto. For di sifranan preliminar por dedusí ku den mayoria di kaso no ta pasó dòkternan di kas no ta alkansabel. CHV ta di opinion ku e promé paso mester ta pa komprondé e pashènt su motivashon.

CHV i su miembronan tambe ta deseá un ofisina sentral pa orarionan di warda, e asina yamá huisartsenpost (HAP) den e kuadro di un refuerso di e kuido primario en general. Esaki ta motibu pa kua dòkternan di kas a hasi hopi esfuerso den kolaborashon ku tur stakeholders. CHV lo sigui na mesa ku tur stakeholders pa atendé e problema ku ta unu kompliká i ku ta afektá nos tur.

CHV ke enfatisá ku mayoria dòkter di kas ta funshoná na un manera íntegro pa nan pashèntnan. Ounke ku durante e krísis di COVID-19 e kantidat di konsulta telefóniko i personal a oumentá, mayoria dòkter di kas a sigui asumí nan responsabilidat i duna trato na pashèntnan ku mester a keda haña trato na kas i tambe pashèntnan ku ta bin konsulta regular. Tambe dòkternan di kas a duna un man na GGD pa yuda ku e trabounan di tèst, duna resultado i duna informashon tokante karentena i isolashon.

Ta opvio ku e trabounan di dòkternan di kas a oumentá kaminda kòmbersashonnan di añanan di CHV i otro stakeholder no a duna fruta pa fortalesé e liña di kuido primario ku ta dòkternan di kas. Den e MOU ku a wòrdu firma dia 23 di mart 2018 e tópiko di refuerso i un HAP a wòrdu ankrá.

CHV ta di opinion ku inspektor di salubridat mester atendé ku kada un dòkter di kas individualmente ku no ta mantené su mes na reglanan di komportashon òf ku ta faya ku e manera di duna kuido.