WILLEMSTAD.- Ya ta algun dia ku e instruktornan di reiles e.o outo, motersaikel, trùk etc, ta para ketu. No tin moveshon na ofisina di reibeweis, konsekuentemente e instruktornan tampoko por laborá pa asina nan generá entrada.

Henter e problema aki ta debí na falta di personal na ofisina di reibeweis. Esei a pone ku asta mester a para eksámen nan pa algun dia. Pero segun e instruktornan a deklará na EXTRA, e problema aki lo no keda na solamente dos dia, debí ku no tin sufisiente personal i tampoko eksaminadó. Konsekuentemente e problema aki lo keda i e instruktornan lo no por laborá manera mester ta i asina generá nan entrada. Ora nan a kere ku kos a normalisá un tiki despues di “Lockdown” i ku nan por kuminsá move bèk, awor nan a haña nan ku otro baño di awa friu.

Tambe e instruktornan a deklará na EXTRA, ku e problema aki ta unu ku ya ta eksistí hopi aña, vários Gobièrnu den pasado a eksperensia e problema i doló di kabes aki, pero niun a hasi nada, i awor ta e instruktornan ta esnan ku ta sali perhudiká.

E instruktornan a indiká di lo no sinta man krusá i lo lucha i bringa pa asina Gobièrnu atendé e problemanan di ofisina di reibeweis ya asina e instruktornan por laborá trankil i generá nan entrada.