WILLEMSTAD.- Ya pa algun tempu instruktornan ku ta duna hende lès pa kore diferente vehíkulo, a reklamá tokante e situashon di kaya den área di ofisina di reibeweis na Sta. Rosa i riba e tereno mes.

No tin ningun marka riba kaya ku ta indiká direkshon, loke ta hasi difísil pa husga e studiantenan ku ta koriendo outo si nan a hasi un eror òf no.

A reklamá basta pero nunka nada a bini afó.

Ayera un grupo di instruktor mes a tuma e desishon di lanta djadumingu trempan i bai marka kaya. A marka e direkshon nan korektamente i awor porfin tur esnan i sigur studiantenan por tin un bista korekto di e señal i direkshon na ofisina di reibeweis.