Pisas den parlamento:

WILLEMSTAD.- E intenshon original di gobièrnu di MFK i PNP tabata pa kumpra e propiedat di Campo Alegre i habri un sentro di prostitushon nobo einan i asina kumpli ku promesa ku MFK a hasi den kampaña elektoral na 2021. E promesa aki tabata ku si e partido drenta gobernashon ta habri e sentro di prostitushon atrobe.

“Nos mester ta sinsero tambe i bisa ku MFK a kampañá ku lo habri Campo Alegre bèk i a mira e posibilidat aki ora ku e propiedat a bira di gobièrnu. A base di pèrmitnan nesesario ku mester otorgá lo a duna direkshon i despues di a hasi análisis lo a kumpli ku promesa ku e partido a hasi durante kampaña na 2021”, promé minister Gilmar ‘Pik’ Pisas a bisa den kontesta riba preguntanan ku parlamentario independiente Zita Jesus-Leito a hasi durante un “vragenuur” (ora di pregunta).

Despues di e kompra sinembargo a surgi protesta di diferente stakeholder Promé minister ta indiká. Pa e motibu aki gobièrnu a pidi ofisina di akountent, SOAB pa hasi un estudio di faktibilidat basá riba pa 3 senario pa futuro destinashon di e propiedat: sentro di bibienda pa hende grandi, hub digital òf negoshi di prostitushon.

Pregunta prinsipal di e estudio di SOAB ta: kiko ta implikashon finansiero, sosial “maatschappelijk”, hurídiko i tékniko pa desaroyá un di e tres negoshinan aki kaminda tabata Campo Alegre. Den e kuadro aki SOAB a entrevistá tur stakeholder i tambe un grupo di enfoke ku ta forma parti di e estudio, Pisas ta sigui bisa.

SOAB a indiká ku tur stakeholder a duna nan aporte na e estudio, pero nan estudio no ta kla ainda. “Di mes no ta gobièrnu ta sigui ku maneho di e edifisionan di Campo Alegre i ta lógiko ku gobièrnu mes no por maneho un sentro di prostitushon.”

Ta despues ku e estudio di faktibilidat ta kla por kuminsá pensa den kua direkshon por bai, esta e promé minister. “Por tin un senario ku gobièrnu komo doño ta hür e propiedat òf duna e tereno den erfpacht pa hasi negoshi. No ta usual ku gobièrnu mes ta den eksplotashon.”

E motibu prinsipal pa kumpra e tereno, segun Pisas a sigui bisa tabata pasobra Ministerio Públiko a konfiská esaki den un kaso di ekspropiashon. Ministerio Públiko i Ministerio di Hustisia tabata karga ku gastunan di vigilansia i mantenshon mínimo di e tereno pasobra nan tabata responsabel.

Esaki segun Pisas tabata kosta gobièrnu 20 mil florin pa luna. “Gobièrnu tabata karga pues ku gastu di un propiedat ku no ta di dje.”

Tambe Pisas ta splika ku gobièrnu a mira ku e propiedat a bai findishi na vários okashon sin ku tabatin interesado ku ke a paga e suma ku tabata pidi pe. Tambe gobièrnu tin 72 mil meter kuadrá èkstra na propiedat loke segun Pik ta unu stratégiko pa pais pasobra el a bira un propiedat di pueblo.

Mas aleu Pisas a bisa ku taksashon i balorashon di e propiedat ta den proseso. Ku esaki por determiná kuantu e invershon ta pa hasi e propiedat apropiá pa un partido ku ta bai eksplotá esaki.

Gobièrnu no tin intenshon pa renobá e edifisionan di Campo Alegre, pero por yega na un akuerdo ku e partido ku ta bai eksplotá e propiedat pa drecha esaki na su nesesidatnan. Tabata ministerionan di Finansa i VVRP a konsehá riba e kompra.

A evaluá diferente benefisio públiko, esta interes general ku tin si gobièrnu tin supervishon kompletu di e propiedat. “E lokalidat ta stratégiko pasobra e ta serka di lama i aeropuerto. E tereno ta grandi ku por ta na benefisio di komunidat. A kumpra e tereno na findishi i ku tempu esaki lo por subi na balor.”

Na 2023 a tene kuenta den presupuesto ku 11 mion florin pa kumpra Campo Alegre. Esaki tabata riba presupuesto bou di pòst ‘gebouwen’. Banda di 8 mion florin na preis di kompra a paga debe di OB ku tabata habrí ainda i gastu di notario. E sèn aki, Pik a ripití a drenta bèk den kaha di gobièrnu.

Konseho di Minister a bai di akuerdo pa kumpra Campo Alegre i a duna minister di Asuntunan General  e apoderashon pa e mes bai pa kumpra e propiedat. “Ta trata di suma haltu i p’esei no a duna apoderashon na otro persona i tabata ke ta transparente ku ta gobièrnu mes a kumpra Campo Alegre.”

Foto:

...Gilmar ‘Pik’ Pisas...