WILLEMSTAD.- No por sigui manda polis i e tim multidisiplinario den e periodo aki sin e hèrmèntnan pa nan aktua. No por sigui kontené e situashon aki sin ku tin sanshon. Gobièrnu tin di rekonosé ku ne momentunan aki no por tene e situashon bou di kontròl di un manera efektivo. Asina Promé Minister di Kòrsou, sr. Eugene Rhuggenaath, a duna di konosé den deklarashonnan pa Parlamento durante e reunion virtual di ayera mainta pa trata e proyekto di Lei di Emergensia.

Segun e mandatario djis pa duna un ehèmpel, aktualmente no tin e hèrmèntnan a evitá aglomerashon di hende kaminda e vírus lo por plama i kontagiá un kantidat di hende, ku e konsekuensia ku e situashon lo por sigui eskalá. Ta hopi difísil pa regla pa aktividatnan públiko òf kaminda por inkluí sanshon pa tur hende kumpli ku nan.

E mandatario a trese dilanti ku tin hende ta puntrando dikon nos lo no hasi loke Aruba a hasi? Den kaso di aki e situashon dado momentu a eskalá, pero di otro banda na Aruba si por a parti but pa hendenan ku no ke kumpli ku reglanan ku gobièrnu a stipulá pa protehá e komunidat.

No tin un base legal pa dekretá un toke de keda. I tin hopi interes pa debatí riba e tópiko di apoderashon di propiedat.

Segun sr. Rhuggenaath, pa algun tempu kaba tin estranheronan ta drenta aki i no tin ningun informashon verídiko di nan. Por ehèmpel, tin un kantidat di kaso di kontagio na Venezuela i prueba di esei ta e grupo di personanan indokumentá ku a bini riba lancha i bou di kual tabatin un kantidat infektá ku COVID-19.

Gobièrnu a pensa dado momentu pa apoderá di e fasilidatnan na Campo Alegre pa por akomodá migrantenan pa asina lo por tin nan den karentena. Pero esei no a resultá posibel. I ta p’esei e Lei di Emergensia lo por ta un instrumento pa por tuma un paso asina.

Segun e mandatario, e ta konvensí ku si tin un lei asina den man, ku un kontròl efektivo i sanshon proporshonal, kasi sigur lo no tin mester di tantu medida asina pa kontené e vírus. Esei pa motibu ku por kontrolá i tambe enforsá e reglanan di un forma muchu mas efektivo ku ta e kaso aktualmente.