WILLEMSTAD.- Den un karta pa parlamento hulandes minister hulandes di Relashon Interno Kajsa Ollongren ta indiká ku ‘Kòrsou pa basta tempu tin un struktura ekonómiko vulnerabel’. Segun e minister hulandes esaki tin komo konsekuensia ku e pais den e último dies aña tabatin un kresementu ekonómiko hopi abou. ‘Esaki den kombinashon ku maneho ekonómiko i finansiero hopi suak tabatin komo konsekuensia ku e finansa di gobièrnu a deteriorá hopi. Pandemia di COVID-19 a deteriorá e problemanan mas aun.’
Minister Ollongren ta skirbi den su karta ku e ‘ratio di debe’ (schuldquote) di Kòrsou for di 10-10-10 ta oumentá tur aña. Den aña 2019 e ‘ratio di debe’ tabata 54 porshento di e Produkto Bruto Doméstiko (‘Bruto Binnenlands Product). Ta ferwagt ku den aña 2020 e ‘schuldquote’ lo krese te 89 porshento. Segun minister Ollongren e límite kritiko ku segun Fondo Monetario Internashonal (IMF) ta konta pa e region karibense ta 55 porshento.
Segun gobièrnu hulandes Kòrsou no por superá e krísis aktual sin yudansa for di Hulanda. Ollongren ta enfatisá den su karta ku e struktura ekonómiko ku tabata eksistente promé ku krísis di Corona na Kòrsou tin ku wòrdu fortifiká supstansial. Manera ta konosí Kòrsou i Hulanda a yega na un akuerdo polítiko resientemente. Komo konsekuensia Hulanda lo yuda Kòrsou pa fortifiká su struktura ekonómiko. Ku esaki Kòrsou tin ku introdusí reformanan struktural pa e ekonomia kompleto di e pais, Ollongren ta enfatisá. Esaki tambe ta un di e kondishonnan di Hulanda pa duna mas sosten likides. Segun Ollongren den su karta na parlamento hulandes Hulanda lo sigui yuda Kòrsou ku esaki. Minister di Relashon Interno di Hulanda Kajsa Ollongren ta indiká den su karta, ku ta yama ‘Toetsingskader risicoregeling: Omzetting van de in oktober 2020 verlopen bulletregeling aan Curaça’, ku intenshon di Hulanda ta ku nan lo sigui duna yudansa na Kòrsou i su ekonomia te aña 2027. Intenshon di Hulanda ta ku den e aña aki Kòrsou ‘si por karga su outonomia finansiero’.