WILLEMSTAD.- E deseo i intenshon di gobièrnu ta pa habri skolnan dia 28 di aprel, pero no por antisipá ainda riba e desaroyonan rondó di COVID, pues lo hasi e anunsio ei na su debido tempu. Esei di akuerdo ku Minister di Enseñansa, Siensia, Kultura i Deporte, sr. Steven Croes. Segun e mandatario, entrante mañan djamars 13 di aprel i te ku djabièrnè 23 di aprel enseñansa lo sigui den forma adaptá, esta ku alumnonan di grupo-8 di skol di fundeshi lo bai skol normalmente, tambe esnan di skol avansá ku ta den klas di eksámen, i tur sobrá alumnonan di skol di fundeshi, skol spesial i skol avansá lo sigui ku lèsnan virtual òf nan lo risibí tarea pa hasi na kas.

Segun sr. Croes, e sa ku dunamentu di lès virtual tin su retonan grandi, i ta p’esei mes e ta konsiderá esaki komo enseñansa di krísis. Ta un reto grandi pa muchanan keda kas i sigui ku lès tòg. Pero lo hasi tur loke ta posibel pa nan por sigui lèsnan virtual òf pa nan mayornan por bai skol i tuma material di lès pa asina tòg nan por sigui ku e formashon na kas.

Mas aleu el a splika ku, skolnan lo kaba pa mas tardá 13:15 or, pues kuartu pasá di un di mèrdia.

Den e periodo di 13 pa 23 di aprel e pruebanan nashonal (landsexamen) ta kontinuá normalmente i segun e skema di ETE. Skolnan SBO, enseñansa profeshonal i universidatnan ta sigui ku lèsnan virtual, i meskos ta konta pa enseñansa djanochi.

Den konsulta ku tur direktiva di skol, EFO ta sigui normalmente. Den kaso ku e situashon den komunidat empeorá, lo komuniká un ke otro na su debido tempu.

Skol ta keda habrí:

Segun sr. Croes, edifisionan di skol lo keda aksesibel pa maestronan ku ta deseá esei. Dosentenan di grupo-8, esnan di klasnan di eksámen, i tambe esnan ku ke duna lès virtual den nan lokal, nan lo por bai skol. Edifisionan di skol lo ta habrí teniendo kuenta ku tur e protokòl di medidanan etc.

Ta importante pa dosentenan tin un komprobante ofisial di skol ku ta indiká ku nan ta kubri e ruta entre kas i skol.

Pa loke ta mobilidat pa mayornan, entre 13 i 23 di aprel, tur mayor den grupo-8 òf na skol pre-eskolar lo por hiba nan yunan. Esaki ta hopi importante pa esnan den funshonnan vital. Mayornan lo por buska nan yunan na skol i opvang i bai kas den oranan di mèrdia i atardi.

Den e periodo ku tin eksámen lo hasi eksepshon riba plachi di dia pa mayornan ku tin yu ku tin di pasa eksámen.

Segun Minister Croes, e intenshon ta pa skol habri bèk dia 28 di aprel. Promé ku e fecha ei lo konfirmá un ke otro. I si a kaso e situashon mester kambia, lo anunsiá esei ku antisipashon.