Víktimanan a brasa otro ora hues a rechasá “skorsing”  di akusado prinsipal

WILLEMSTAD.-  Akusado prinsipal den kaso “Freedom”  ku ta otro kaso di trafikashon di hende, a keda enkarselá te dia ku e kaso keda tratá den su kontenido.

Pa ku e kaso aki Ministerio Públiko ta akusá  4 sospechoso.

Ta trata di e akusadonan J.F.J., Y.Y.N.T., K.A.F. i R.J.

E sospechoso prinsipal Y.Y.N.T alias “Lady” ta un akusado femenino nasé na Venezuela ku ta keda konsiderá komo un persona basta  kruel pa e víktimanan. Huntu ku “Lady” su pareha i su yu tambe ta wòrdu akusá komo kómplise den e kaso aki.

Tur e akusadonan  ta keda akusá pa trafikashon i eksplotashon di hende, mal uso di damanan pa hasi sèks ku otronan kontra nan boluntat, laga e damanan traha miéntras nan tabata sa  ku nan ta ilegal, obligá nan paga nan Internet, kuminda, kamber, koriente, awa sin ku nan tabata wòrdu pagá i obligá pa para riba sapatu haltu mas di 9 ora.

Tambe e sospechosonan ta keda akusá pa komplisidat di  tuma e damanan ilegal den nan kas pa hospedá, sabiendo ku nan ta ilegal.

Abogado  di e akusado a pidi pa posponé su detenshon te dia su kaso keda tratá, pero fiskal a pidi hues pa rechasá e petishon kategorikamente.

Fiskal a splika ku e víktimanan ta hopi spantá  di  e akusado.

Mirando ku e kaso mester a wòrdu presentá un bia mas den pro forma, e víktimanan tabatin hopi miedu ku e akusado prinsipal “Lady” su detenshon lo keda posponé.

Esaki a pone ku nan a traha un karta pa fiskal indikando un suseso lamentabel ku a pasa ku un di e víktimanan su pareha resientemente.

Fiskal a  duna di konos’é ku un di e damanan su pareha a wòrdu hañá karbonisá na Venezuela.

Nan ta sospechá ku ta e akusado prinsipal a laga kometé esaki, mirando ku el a menasá un di e víktimanan di kima su kasá  den prizòn. Tambe tabatin intento di sekuestro di un otro dama su pareha na Venezuela, pero esaki a bai kompletamente robes.

Segun e informashon polis a arestá e personanan ku a trata di hasi esaki i a bisa ku ta “Lady “ tabata tras di e sekuestro.

Fiskal a duna di konosé ku e víktima tin hopi miedu  di  “Lady” i  ta teme pa nan bida si e sali.

E víktimanan a bisa ku “Lady” tin hopi poder i tin hopi hende ku e por influensiá pa hasi e loke nan ku e ke.

Segun fiskal, hustisia di Kòrsou no por akusá e akusado pa e kasonan ku a sosodé na Venezuela  i tampoko no tin niun prueba ku ta e akusado lo ta tras di e aktonan aki.

Mirando e akusashonnan grave ku tin kontra di e akusado den e kaso “ Freedom”, fiskal a pidi hues pa rechasá e petishon di kua hues a bai di akuerdo ku esaki.

Dos víktimanan ku tabata sinta den e sala komo partido perhudiká a brasa otro di felisidat, na momento ku hues a rechasá e petishon pa akusado bai kas.