WILLEMSTAD. - Awor ta purba hòrta asta trùk di Aqualectra.

Djasabra durante oranan di dia, polisnan mester a bai na Bahamasweg, Buena Vista despues di a risibí informashon di un kaso di intento di ladronisia di un vehíkulo di Aqualectra ku a tuma lugá.

Na nan yegada e patruya a komprondé ku algun ratu promé, ladronnan a kometé destrukshon na un trùk di Aqualectra. Nan a purba bai ku esaki, pero no a logra. Esei a pone ku nan a kometé ladronisia na e trùk. Nan a logra bai ku bateria, kaha di hèrmènt, machete, sèt di sòket i vários material mas.

Tambe e ladronnan a kibra e bentana pa por a habri tapa di mashin i bai ku e bateria.