WILLEMSTAD .- Den oranan di djabièrnè anochi pa djasabra marduga mas o ménos 03.20 outoridatnan mester a bai na sede di partido PAR na Fokkerweg despues di a risibí yamada di un persona indikando ku e ta mira kandela den sede di e partido. Na yegada di outoridatnan bèrdat a deskubrí e kandela ku tabata mínimal na e momentu ei. Mesora a pidi presensia di kuerpo di bombero pa inisiá ku e proseso pa paga e kandela pa evitá ku esaki lo por sigui ekspandé i sende edifisionan den banda tambe na kandela. Investigashon preliminar ta indiká ku malechornan a manda un proyektil kontra di e glas, parti dilanti di e sede. Esaki a kousa e kandela ku a hasi daño na parti dilanti, tantu paden komo pafo di e sede. Extra a hiba kòmbersashon ku Presidente di Partido PAR, sra. Zita Jesus-Leito, ku a konfirmá ku nan a risibí e yamada di outoridatnan indikando pa nan presentá mas pronto posibel na nan sede p'asina nan pa pone nan mes na altura di e situashon. Outoridatnan lo sigui ku proseso di investigashon pa wak si lo por logra saka'fó ken ta esun òf esnan responsabel pa e akto akí.