WILLEMSTAD.- Sentenáres di hende na Hulanda a registrá pa yuda na hospital na Kòrsou i ku vakunashon di hende kontra Corona.
Nan a registrá nan mes via e inisiativa 'Extra handen voor de zorg' (ku ta nifiká: ‘Mannan èkstra pa e kuido’). For di tur boluntario a traha un tim ku ta konsistí di kuarenta persona, entre nan médikonan, enfermero i enfermeranan i tambe personal sostenedó. Si tur kos ta bai bon e tim lo bai Kòrsou e djabièrnè aki. For di wikènt pasá un grupo di binti dòkter i enfermero i enfermeranan a sali Hulanda kaba pa bai Kòrsou.
Segun e inisiadó di ‘Extra handen voor de zorg’ e interes na Hulanda pa yuda Kòrsou ta hopi grandi. Djadumingu pasá mas ku 350 hende a registrá. E inisiativa ta traha riba petishon di ministerio di Salubridat na Hulanda.
Segun un bosero di e organisashon ta hopi bunita pa mira kuantu hende ta disponibel pa sali riba término kòrtiku pa yuda sektor médiko di Kòrsou i ku esaki yuda pueblo di Kòrsou. Segun e bosero tur di e personanan ku a registrá ‘realmente ta hende ku tin kuido den nan pechu’.
Te ainda no ta kla presis na unda e tim ku ta konsistí di 40 hende for di Hulanda lo traha na Kòrsou. Probablemente nan lo duna yudansa ámbos na hospital i den sentronan di vakunashon. Intenshon ta ku e grupo lo duna un man na unda e nesesidat ta mas grandi.