WILLEMSTAD.- Den kooperashon ku SOAW, Korpodeko a pone un fiansa mikro pa empresanan chikí. E proyekto ta titulá Mikro Empresa i ta bou di guia di SOAW i Korpodeko. Ayera e proyekto a start sali den sentro di bario Soto.

Esaki ta un proseso intensivo kaminda ku lo bishitá 15 bario aki na Kòrsou ku lo kubri Kòrsou kompleto.  E programa ta hopi amplio entre otro di guia, fiansa pa kuminsá un negoshi nobo, fiansa pa negoshi eksistente i e promé bario Banda Bou a haña bishita ayera tardi.

E reakshon di e bario tabata sorprendente asina e direktor di Korpodeko Chesron Isidora a duna di konosé den entrevista ku EXTRA na final di e presentashon.

“A bai hopi bon, nos a keda sorprendí di kantidat di hende. Sala tabata yen yen i hopi hende pará den fila pa inskribí. Nos a papia mas òf ménos mei ora pa duna informashon i despues e reakshon tabata di esnan presente”, esaki Chesron Isidora a bisa EXTRA despues di e sekshon di informashon.

El a bisa EXTRA ku e ni por bisa kua ta e direkshon ku mas e hendenan ke haña e fiansa pe, pero mas bien tabata un meks.

Intenshon ta pa haña hende ku tin negoshi kaba i posibilidat pa hasi e negoshi mihó i ekspandé. Hendenan ku tin idea drumí basta tempu i ke hasi algu pa nan mes. Tabatin di tur un poko entre e hendenan ku a papia kuné.

“Loke si bo ta sinti serka tur hende ta un hamber formal pa guia, pasobra e programa tin hopi guia den dje. I tin hende ku tin nan mes negoshi i ta lora man pero ke formalis’é i muchanan hóben ku tambe ke kuminsá hasi algu pa nan mes”, sr. Isidora a splika.

Manera EXTRA a splika den nos edishon di ayera, e parti di guia ta siña e empresario kon atendé ku tur instansianan ku tin di aber ku negoshi. Despues di esaki ta bin e trayekto di fiansa.

E meta ta pa e empresarionan bira independiente i di e forma ei nan por krese i pone mas hende na trabou i asta kisas bin na remarke pa fiansanan mas grandi pa sigui krese.

E próksimo lo sigui den mas bario na Kòrsou.