WILLEMSTAD.- “Institute for Professional Excellence “(IPE) ku ta un organisashon konsistiendo di e.o SOAB, Aqualectra, Bureau Telecomunicatie & Post i tambe CHATA ayera a tene un seminario gratuito i sumamente interesante pa tur esnan ku ke forma un karera den e mundu di teknologia i digitalisashon.

E interes tabata hopi grandi pero debí na medidanan pa ku Covid-19 por a tuma solamente 75 persona na e seminario aki.

IPE no ta solamente forma siudadanonan pa nan ta prepará awe pa e djòpnan di futuro pero tambe ta duna hendenan ku a pèrdè trabou pa diferente motibu e oportunidat di drenta komersio bek den un otro sektor i gana nan pan di kada dia i bira un profeshonal riba e tereno spesífiko.

Direktor di Bureau Telecommunicatie & Post Sr. Franklin Sluis a indiká na EXTRA ku den e último tempunan ta hopi hende a pèrdè trabou prinsipalmente hendenan ku tabata laborá den e sektor hotelero, refineria Isla, UTS i tambe Aqualectra.  Tur e hendenan aki tabata e motibu ku IPE a pensa un formulá kon por duna un kontribushon na tur e personanan aki. Aparte di e áreanan aki lo bai pone énfasis den diferente área di interes ku siudadanonan tin.

Lo bai tin un kantidat di kurso i seminario den futuro. Ta bai kuminsá ku 5 estudio na nivel 1 di kual kada klas lo konsistí di 30 persona.

Aqualectra tambe ta forma parti di e grupo di maneho di IPE. Darick Jonis direktor di Aqualectra tambe a pone énfasis ku mester desaroyá e kuerpo laboral. Mas i mas mundu ta modernisando i ta birando digital i Aqualectra tambe ta sintiendo esaki.

Aktualmente Aqualectra ta dependé hopi di “Software”, segun Jonis.

Den e seminario di ayera a pone énfasis na e sistemanan outomatisá ku Aqualectra ta dependé di dje i pa eseinan mester di hende kapasitá i na nivel pa por hasi e trabou. Jonis a indiká ku den e próksimo seminarionan ku lo tin, lo papia tokante Panelsolar, fibra óptiko kual tambe ta importante. Ku esaki ke krea un futuro nobo pa nos hendenan i nos pais.

Dos aña pasa SOAB tambe a uni ku IPE pa asina yuda pasa konosementu na siudadanonan. SOAB tambe ta mirando e desaroyonan ku ta tumando lugá mundialmente. Geomaly Martes eks direktor di SOAB a indiká ku por ehèmpel e akountent tradishonal tambe a kuminsá disparsé tiki tiki i pronto lo bini otro tipo di akountent mundialmente. Awor aki ya kaba tin diferente “Software” ku ta drai nan so i kontrolá tur kos. E profeshonalnan aktual pronto lo baha i mester kuminsá pasa nan konosementu for di awor. SOAB tambe ta yuda ku diferente treinen na esnan interesá den e área.

Di e forma aki por re-entrena tur esnan ku a pèrdè trabou pa nan por drenta e sektor laboral bek.