EXTRA a puntra BTP, Curoil i doño di pòmp

WILLEMSTAD.-Gasolin i diesel ta e produktonan petrolero ku ta wòrdu usá pa tur tipo di vehíkulo aki na Kòrsou. Último añanan gobièrnu a disidí ku ta hinka e kalkulashon di tarifa di kombustibel den man di Bureau Telecommunicatie & Post (BTP) pa di e forma ei kita for di e situashon ku adaptashon di tarifanan ta keda na bon gana di e gobièrnu òf polítiko na mando. Den pasado a yega di sosodé ku si tin elekshon na kaminda e polítiko na mando lo no adaptá preis di kombustibel ni maske esei ta e realidat a base di kalkulo i kompra na nivel internashonal. Pues awendia BTP ta hasi kalkulo i ta determiná e preis maksimo. EXTRA a bai investigá si tin espasio pa un pòmp por bende bou di e preis maksimo.

Hopi tempu pasá e kompania di gobièrnu Curoil tabata kumpra gasolin produsí lokalmente den refineria na Kòrsou. Awendia Curoil ta importá produktonan petrolero. EXTRA a puntra si lei ta permití pa un pòmp di gasolin por ofresé su klientenan òf grupo di klientenan un otro tarifa (redukshon di e tarifa maksimo). Tambe a puntra te kon leu kompanianan di gobièrnu òf gobièrnu mes por tin influensia riba e echo ku por ofresé redukshon di tarifa maksimo i finalmente ki ròl e kompanianan di gobièrnu tin i si nan por prohibí òf opstakulisá ku un doño di pòmp por ofresé su klientenan un redukshon manera ta sosodé den otro paisnan.

Riba e preguntanan di EXTRA Curoil a kontesta ku ta BTP ta regulá preis a base di fakturanan di kompra ku nan ta tuma di Curoil huntu ku otro gastunan pa asina nan hasi kalkulashon. Asina BTP ta stipulá e preis. Kada pòmp di gasolin tin un márgen di 17 sèn riba kada liter ku nan bende. BTP ta reguladó pues Curoil no por hasi algu na e preis.

Den su investigashon EXTRA a puntra na dos representante di asosiashonnan di pòmp di gasolin.Unu a kontesta ku doñonan di pòmp a hiba kombersashon ku minister di MEO sra. Larmoni-Cecilia i a lanta un komishon pa traha riba puntonan delikado. Nan ke purba tene e ambiente den tur trankilidat. No por a kontesta si e punto spesífiko aki tambe a bini dilanti den kombersashon ku minister Larmonie-Cecilia.

Di parti di BTP nan a kontesta EXTRA nan ta reguladó. Tur tarifa pa kombustibel ta regulá, bou di kua gasolin i diesel ta toka tarifanan maksimo. Esaki ta nifiká ku un doño di pòmp den e kaso aki semper por manehá un tarifa mas abou ku e tarifa fihá. Mas aleu BTP a kontesta pregunta di EXTRA indikando ku e tarifa maksimo pa kombustibel ta keda fihá pa minister di Desaroyo Ekonómiko, despues di a risibi konseho di BTP. Doñonan di pòmp por disidí pa nan mes si nan ta apliká un tarifa mas abou pa kobra e usuario si òf no. Ni Curoil ni BTP no tin niun partisipashon òf poder den desishon di maneho di tarifa as abou òf laga di e doñonan di pòmp.