Den kuadro di Dia di Tata den luna di yüni

WILLEMSTAD.- Djaweps 13 di yüni, lo bai tin un interkambio na mesa titulá: ‘Tata tambe tin derechi’. Esaki lo tuma lugá den oula di University of Curaçao (UoC) di 7’or pa 9:30 anochi.
E interkambio na mesa aki ta un inisiativa di Fundashon Bos di Hubentut huntu ku University of Curaçao i ta e promé den e siklo di aktividatnan den luna di yüni den kual Hende hòmber i Tatanan ta sentral, mirando ku den luna di yüni ta selebrá Dia di Tata.
Richeron Balentien, Giany Girigoria, Quincy Girigorie, Ivan Kuster i Lindon Marcelia lo ta algún di esnan ku lo sinta na mesa i interkambiá riba diferente ponensia tokante hende hòmber i nan derechinan.
Motibu ku a skohe pa dediká luna di yüni na hende hòmber i tatanan, ta ku e posishon di hopi hende hòmber i tatanan lamentablemente no ta esun mas ideal. Di akuerdo ku Rector Magnificus di UoC Dr. Francis de Lanoy, hopi bia e hende hòmber ta kai chikí ora ta trata apresio i rekonosementu. Esaki por tin konsekuensianan devastador pa e desaroyo di e yunan i konsekuentemente tambe pa henter e komunidat.
Direktor di Bos di Hubentut Sheila Albertoe, ta indiká ku durante e añanan hasiendo e trabou di brinda yudansa na mucha i hóbennan den momento di krísis, ta notabel ku mas i mas hende hòmber tambe ta aserká Bos di Hubentut pa pidi yudansa debí ku nan ta kai víktima di entre otro restrikshon di kontakto ku nan yunan i violensia físiko na man di hende muhé.
Dor di organisá aktividatnan manera e interkambio na mesa di djaweps awor, Bos di Hubentut i UoC ke enkurashá mas diálogo riba problemanan ku hende hòmber ta enfrentá, pa asina komunidat por haña un mihó bista di kiko ta pasando ku e hende hòmber i asina kuminsá kana e kaminda pa trese un kambio den e konotashon negativo ora ta trata di hende hòmber.
Bos di Hubentut i UoC ta invitá pueblo di Kòrsou, pero spesialmente tatanan i hende hòmbernan pa asistí dia 13 di yüni na e interkambio na mesa den oula di University of Curaçao, ku lo bai ta hopi informativo i interesante.