WILLEMSTAD - International School of Curaçao (ISC) djasabra 24 di òktober a selebrá e apertura ofisial di su ISC Legacy Theater nobo. E akontesimentu aki ta marka un momento importante den historia di skol, ku awor tin un espasio spesial dediká na ekspreshon artístiko, kreatividat i partisipashon di komunidat.

Ku 87 asiento konfortabel i un sistema moderno di zonido i lus, e teatro nobo ta ofresé un ambiente íntimo ku fasilidatnan di kalidat profeshonal pa presentashonnan teatral, presentashonnan musikal, eksposishonnan i otro aktividatnan kultural.

E espasio nobo lo duna studiantenan mas oportunidat pa desaroyá nan talento, fortifiká nan konfiansa i eksperensiá e emoshon di subi riba un podio pa presentá dilanti di un públiko real.

Guiá pa e lema di e teatro, “Honoring the Past, Inspiring the Future” (Honrando pasado, inspirando futuro), e seremonia di apertura ‘a selebrá e espiritu di generosidat ku a forma i sigui marka e historia di ISC durante tur e añanan’.

Direktor Douglas Vaughan den su presentashon a  enfatisá ku: “E ISC Legacy Theater ta representá un kompromiso pa stimulá kreatividat, fortifiká konfiansa den mes, promové kolaborashon i duna studiantenan oportunidat pa deskubrí i kompartí nan talentonan.”

E apertura a reuní miembronan di komunidat di ISC “pa selebrá no solamente un kapítulo nobo den desaroyo di skol, sino tambe e personanan, di pasado i di presente, kende nan kontribushon a hasi e logro aki posibel”, segun Vaughan.