WILLEMSTAD.- Ayera In-terpol a pone man riba e hòmber N. Da Silva Dos Santos.
Da Silva Dos Santos a keda kondena den korte di apelashon na 3 luna di kastigu pa un kaso di aksidente lamentabel, kaminda 3 hende ku tabata kana a keda alkansá pa un outo mortalmente na aña 2013. El a bai korte di kasashon 2 bia pero su kaso no a keda trata te ku awor.

Extra a drenta den kontakto ku su abogado mr Blonk, di kual el a bisa ku su kliente nunka a trata na hui.
Segun e abogado e ta kere mas bien ku su kliente a bai fo’i pais, mirando ku despues di e suseso e no tabata por a haña trabou mas aki na Kòrsou. Kisas aworakí a yega e momento pa e akusado bai sinta su kastigu i mirando ku e ta fo’i pais , OM a duna outorisashon na Interpol pa hasi su detenshon.
Da Silva Dos Santos ta keda akusá di a kousa un aksidente di tráfiko 4 di ougùstùs 2013, ku a kosta bida di 3 joggers ;Monique van Meerwijk, Elton Montesant i Kristen Leyba di Road Runners Club Curaçao riba EEG-weg.
E loke ku rapòrtnan médiko a konstatá ta ku sra. Meerwijk (58) a fayesé mesora dor di trouma ku el a risibí dor dje impakto, sra. Leyba (32) a base di leshonnan grave i sr. Montesant (67) debí na pèrdida di sanger den korto tempu.
T’asina ku Dos Santos Da Silva tabatin tin dos trabou. E tabata traha parti mainta di 8’or pa 12’or di media, i algu promé ku 6’or di atardi, e ta bai traha na un cafe den área di Zuikertuintje.
Esei a sosedé dia 3 di ougùstùs i 4’or di mardugá di dia 4 di ougùstùs ora el a stòp di traha.
Na e cafe mes el a dal dos serbes, kaba a sigui pa un snek i a dal dos serbes mas. Despues di esei e ku su kolega a bai cafetaria di Bon Bini Supermarket kaminda el a kome algu i bebe un djus. Seguidamente el a bai baha su kolega na Hato. El a sali Hato i ta bayendo kas.
Durante di e kaso e akusado a bisa ku henter e kaminda el a kore masha normal i no a sinti nada.
El a pega soño na altura di e krusada di bai Veeris. Despues di esei e no sa nada mas, i ta “bram” el a tende, i a mira e rotònde su dilanti.
E akusado a bisa hues ku e no ta kòrdá nada mas ku no ta ora el a tende “bram” ku el a lanta for di soño. El a mira e rotònde Beto Adamus, i a trata di kita p’esaki.
Ora el a kita, el a sigui kore bai ku su outo, i na altura di ofisina di EXTRA el a para e vehíkulo.
Segun Da Silva Dos Santos, e ora ei el a mira su outo kibra, el a yama polis i tambe ambulans. E outo tabata kibra parti dilanti i tambe e winshil kibra.
INVESTIGASHON TEKNIKO
Segun investigashon tékniko polisial nan no a haña niun rastro di brek riba kaminda ku ta indiká ku e outo lo por a para, pero si di e outo ku a sigui kore bai.
E parti di rastro tabata masha relevante, pasombra na momentu ku polisnan a detené e akusado, el a indiká ku e brek dje outo a faya.
E akusado a nenga di bisa polisnan esaki. Durante tratamentu di e kaso, el a bisa hues ku el a splika e polisnan ku ta soño el a pega.
E akusado no tabatin reibeweis.